સુરત રેલવે સ્ટેશન પર ૧૦૯૮ ચાઇલ્ડ હેલ્પલાઇન અને RPFની સંકલિત કામગીરીથી ૧૪ વર્ષીય બાળકી માટે સુરક્ષિત આશ્રયની વ્યવસ્થા
(રહિમ પઠાણ દ્વારા, સુરત) : તા. ૦૮. સુરત રેલવે સ્ટેશનના પ્લેટફોર્મ નંબર ૧ પરથી ૧૪ વર્ષીય બાળકી મળી આવતાં ૧૦૯૮ ચાઇલ્ડ હેલ્પલાઇનની ટીમ દ્વારા તાત્કાલિક પ્રતિસાદ આપવામાં આવ્યો હતો. બાળકીની ઉંમર અને પરિસ્થિતિને ધ્યાનમાં રાખીને તેને ચાઇલ્ડ હેલ્પલાઇનની કચેરી ખાતે લાવવામાં આવી હતી, જ્યાં તેની પરિસ્થિતિ સમજવા અને જરૂરી સહાય પૂરી પાડવા માટે કાઉન્સેલિંગ કરવામાં આવ્યું હતું.
કાઉન્સેલિંગ દરમિયાન બાળકી દ્વારા જણાવવામાં આવ્યું હતું કે તે ઘરેથી નીકળીને એક પરિચિત યુવકને મળવા માટે સુરત આવી હતી, પરંતુ તે યુવક તેને મળવા આવ્યો ન હતો. પરિણામે બાળકી રેલવે સ્ટેશન પર એકલી રહી ગઈ હતી. બાળકી પાસે પરિવારનો સંપર્ક કરવા માટે કોઈ સંપર્ક નંબર ઉપલબ્ધ ન હોવાથી પરિવાર સાથે સંપર્ક સ્થાપિત કરવા માટે પ્રયાસો કરવામાં આવ્યા હતા.
આ દરમિયાન એક મુસાફરના મોબાઇલ ફોનની મદદથી પરિચિત યુવકનો સંપર્ક કરવાનો પ્રયાસ કરવામાં આવ્યો હતો. ત્યારબાદ બાળકીની માતા સાથે કોન્ફરન્સ કોલ દ્વારા વાતચીત કરવામાં આવી હતી. વાતચીત દરમિયાન બાળકીની માતાએ જણાવ્યું હતું કે તેમણે બાળકીને પોલીસ સ્ટેશન પાસે જવા માટે કહ્યું હતું. જોકે, પરિચિત યુવકનો ફરીથી સંપર્ક કરવાનો પ્રયાસ કરતાં તેનો મોબાઇલ ફોન સ્વિચ ઓફ આવતાં સંપર્ક થઈ શક્યો ન હતો.
આ પરિસ્થિતિને ધ્યાનમાં રાખીને ૧૦૯૮ ચાઇલ્ડ હેલ્પલાઇનની ટીમ દ્વારા બાળકીનું કાઉન્સેલિંગ કરવામાં આવ્યું હતું. તેને પોતાની સુરક્ષા જાળવવા, અજાણ્યા સ્થળે એકલા રહેવાના સંભવિત જોખમો સમજવા અને મુશ્કેલીના સમયે પરિવારજનો અથવા સંબંધિત તંત્રની મદદ લેવા અંગે માર્ગદર્શન આપવામાં આવ્યું હતું. ભવિષ્યમાં આવી પરિસ્થિતિનું પુનરાવર્તન ન થાય તે હેતુથી પણ જરૂરી સમજ આપવામાં આવી હતી.
બાળકીની ઉંમર અને પરિસ્થિતિને ધ્યાનમાં રાખીને તેની સુરક્ષા અને સંભાળને પ્રાથમિકતા આપવામાં આવી હતી. આગળની કાર્યવાહી અંતર્ગત બાળકીની જરૂરી તબીબી તપાસ કરાવવામાં આવી હતી. ત્યારબાદ RPF અને ૧૦૯૮ ચાઇલ્ડ હેલ્પલાઇનની ટીમ વચ્ચે સંકલન કરીને બાળકીને સુરક્ષિત સંભાળ અને આશ્રય માટે ચિલ્ડ્રન હોમ ફોર ગર્લ્સ ખાતે સોંપવામાં આવી હતી.
આ સમગ્ર કામગીરી દરમિયાન ૧૦૯૮ ચાઇલ્ડ હેલ્પલાઇનની ટીમ દ્વારા બાળકીનું કાઉન્સેલિંગ, પરિવાર સાથે સંપર્ક સ્થાપિત કરવાના પ્રયાસો, તબીબી તપાસ માટે સંકલન અને સુરક્ષિત આશ્રયની વ્યવસ્થા કરવામાં આવી હતી. RPF અને ૧૦૯૮ ચાઇલ્ડ હેલ્પલાઇનની સંકલિત કામગીરીથી બાળકીની સુરક્ષા અને સંભાળ માટે જરૂરી પગલાં લેવામાં આવ્યાં હતાં.
○○○
સૌથી મહત્વપૂર્ણ બાબતથી ચૂકશો નહીં.
👉🏻 ગુજરાત રક્ષા હમણાં જ ડાઉનલોડ કરો અને માહિતીની શક્તિથી સુરક્ષિત રહો !
_______________
About The Author
