તીવ્ર ગરમી વચ્ચે આરોગ્ય વિભાગની જનતાને અપીલ : સાવચેતી રાખી સ્વાસ્થ્યનું રક્ષણ કરો
(પ્રતિનિધિ દ્વારા, વ્યારા) : રાજ્યભરમાં હાલ તીવ્ર ગરમીનો પ્રકોપ જોવા મળી રહ્યો છે. દિવસે દિવસે વધતા તાપમાનને કારણે લોકો ગરમીથી પરેશાન થઈ રહ્યા છે. આવી પરિસ્થિતિમાં લોકો ગરમીજન્ય બીમારીઓથી બચી શકે તે માટે જનજાગૃતિના ભાગરૂપે ગરમીથી બચવાના વિવિધ ઉપાયો અંગે માર્ગદર્શન આપવામાં આવ્યું છે.
જાહેર કરવામાં આવેલા સૂચનો અનુસાર બપોરે 12 થી 4 દરમિયાન કારણ વિના બહાર જવાનું ટાળવું જોઈએ. આ સમયગાળા દરમિયાન સૂર્યપ્રકાશ અને ગરમીનું પ્રમાણ સૌથી વધુ હોય છે, જેના કારણે લૂ લાગવાની શક્યતા વધી જાય છે. ખાસ જરૂરી કામ હોય ત્યારે જ બહાર નીકળવું અને શક્ય હોય તેટલું છાંયડામાં રહેવું.
ગરમીમાં શરીરમાં પાણીની ઉણપ ન સર્જાય તે માટે પૂરતું પાણી પીવું ખૂબ જરૂરી હોવાનું જણાવાયું છે. સાથે સાથે ORS, છાશ અને લીંબુ પાણી જેવા પ્રવાહી પદાર્થોનું નિયમિત સેવન કરવાની સલાહ આપવામાં આવી છે. આ પીણાં શરીરને ઠંડક આપવાની સાથે શરીરમાં જરૂરી ક્ષાર અને પાણીનું સંતુલન જાળવવામાં મદદરૂપ બને છે.
વિભાગ દ્વારા ખાસ કરીને બાળકો, વૃદ્ધો અને ગર્ભવતી મહિલાઓને ગરમીમાં વિશેષ કાળજી રાખવાની અપીલ કરવામાં આવી છે. આ વર્ગના લોકો ગરમી પ્રત્યે વધુ સંવેદનશીલ હોવાથી તેઓએ તડકામાં બહાર જવાનું ટાળવું અને પૂરતો આરામ કરવો જરૂરી છે.
તડકામાં નીકળતી વખતે છત્રી, ટોપી અથવા ગમછાનો ઉપયોગ કરવો જોઈએ જેથી સીધા સૂર્યપ્રકાશથી બચી શકાય. હળવા અને સુતરાઉ કપડાં પહેરવાથી પણ શરીરને આરામ મળે છે અને ગરમીનો પ્રભાવ ઓછો થાય છે.
આ ઉપરાંત તીવ્ર ગરમીમાં વધુ પડતો શારીરિક શ્રમ કરવાનું ટાળવાની પણ અપીલ કરવામાં આવી છે. ખાસ કરીને મજૂરો, ખેડૂતોએ અને બહાર કામ કરતા લોકો માટે આ સલાહ અત્યંત મહત્વપૂર્ણ ગણાવવામાં આવી છે.
આરોગ્ય નિષ્ણાતોના જણાવ્યા અનુસાર જો ચક્કર આવવા, માથાનો દુખાવો, વધારે તરસ લાગવી, થાક લાગવો અથવા બેહોશી જેવી સ્થિતિ સર્જાય તો તરત જ તબીબી સારવાર લેવી જોઈએ.
વધતી ગરમી વચ્ચે નાગરિકો સાવચેત રહે અને જાહેર કરાયેલા ઉપાયોનું પાલન કરે તો ગરમીજન્ય સમસ્યાઓથી સુરક્ષિત રહી શકાય છે.
સૌથી મહત્વપૂર્ણ બાબતથી ચૂકશો નહીં.
👉🏻 ગુજરાત રક્ષા હમણાં જ ડાઉનલોડ કરો અને માહિતીની શક્તિથી સુરક્ષિત રહો !
________________
ગુજરાત રક્ષા અખબારનાં વધુ અપડેટ અને સમાચારો મેળવવા માટે whatsapp ગ્રુપમાં જોડાવો, અહીં કલીક કરો.
_________________
👉🏻 JOIN OUR TELEGRAME CHANNEL 👈🏻
https://t.me/gujaratraksha
About The Author
