પશ્ચિમ બંગાળ અને તમિળનાડુમાં મોટા ઉલટફેરના અણસાર, આસામમાં ભાજપ હેટ્રિક તરફ

પાંચ રાજ્યોની ચૂંટણીના શરૂઆતના પરિણામો જોતા પશ્ચિમ બંગાળમાં પરિવર્તન અને તમિલનાડુમાં નવા રાજકીય યુગની શરૂઆત થઈ શકે છે. આસામમાં ભાજપનો ગઢ અકબંધ છે, જ્યારે કેરળમાં કોંગ્રેસ આગળ ચાલી રહી છે.

દેશના પાંચ રાજ્યો પશ્ચિમ બંગાળ, તમિળનાડુ, કેરળ, આસામ અને પુડુચેરીમાં આજે વિધાનસભાની ચૂંટણીઓના પરિણામો જેમ-જેમ જાહેર થઈ રહ્યા છે, તેમ-તેમ રાજકીય પક્ષોના શ્વાસ અદ્ધર થઈ રહ્યા છે. સવારે 10 વાગ્યા સુધીના આંકડા જોતા પશ્ચિમ બંગાળ અને તમિળનાડુમાં મોટા ઉલટફેરના સંકેત મળી રહ્યા છે. જ્યારે આસામમાં ભાજપ વિજયની હેટ્રિક તરફ આગળ વધી રહ્યું છે. આ ચૂંટણીમાં સૌની નજર પશ્ચિમ બંગાળ પર છે. શું આ વખતે મમતા બેનર્જી તેમની સત્તા જાળવી શકશે કે પછી ભાજપને SIR ફળશે?

સવારે 10 વાગ્યા સુધીમાં પશ્ચિમ બંગાળની 294 બેઠકમાંથી 152 બેઠકો પર ભાજપ આગળ ચાલી રહ્યું હતું, જ્યારે મમતા બેનર્જીની તૃણમૂલ કોંગ્રેસ (TMC) 52 બેઠકો પર આગળ ચાલી રહી હતી .

સૌથી ચોંકાવનારા આંકડા તમિળનાડુમાં જોવા મળ્યા છે. જેમાં પહેલી વખત ચૂંટણીમાં ઝંપલાવનારા એક્ટર વિજયની પાર્ટી એકલા હાથે પાર્ટી બનાવે તેવી શક્યતા દેખાઈ રહી છે. સવારે 10 વાગ્યા સુધીમાં અહીં 234 બેઠકોમાંથી ડીએમકે 71 બેઠક પર આગળ ચાલી રહી હતી, જ્યારે એક્ટર વિજયની પાર્ટી ‘તમિલગા વેટ્ટ્રી કઝગમ'(TVK) 62 બેઠકો પર આગળ ચાલી રહી હતી. જ્યારે AIDMK 44, કોંગ્રેસ 3, CPI 3 અને અન્યો 7 બેઠકો પર આગળ હતા. જ્યારે ભાજપનું ખાતું પણ ખૂલ્યું નહોંતું.

જ્યારે આસામમાં ભાજપ 56 બેઠકો પર આગળ ચાલી રહ્યો હતો અને કોંગ્રેસ 28 બેઠકો પર આગળ હતી. જ્યારે AGP 7, AIUDF 1 અને અન્યો 14 બેઠકો પર આગળ ચાલી રહ્યા હતા. તે જોતા અહીં ભાજપ જીતની હેટ્રિક લગાવે તેવું લાગી રહ્યું છે.

કેરળની 140 બેઠકોમાંથી સવારે 10 વાગ્યા સુધીમાં કોંગ્રેસ 43, CPI(M) 28, IUML 13, CPI 10, BJP 6 અને અન્યો 15 બેઠકો પર આગળ ચાલી રહ્યા હતા.

પુડુચેરીની વાત કરીએ તો અહીં સવારે 10 વાગ્યા સુધીમાં 30 બેઠકોમાંથી ભાજપ 9, કોંગ્રેસ 7, AINRC 3 અને અન્યો 3 બેઠકો પર આગળ ચાલી રહ્યા હતા. જ્યારે DMKનું ખાતું ખૂલ્યું નહોંતું.

SIRની કામગીરી બાદ થયેલી આ ચૂંટણીઓના પરિણામો ઘણા ચોંકાવનારા રહી શકે છે. ખાસ કરીને પશ્ચિમ બંગાળમાં મમતા બેનર્જીના ગઢમાં ભાજપ આ વખતે ગાબડું કરે તેવી પૂરી શક્યતા જોવા મળી રહી છે.

સૌથી મહત્વપૂર્ણ બાબતથી ચૂકશો નહીં.

👉🏻 ગુજરાત રક્ષા હમણાં જ ડાઉનલોડ કરો અને માહિતીની શક્તિથી સુરક્ષિત રહો !

________________

ગુજરાત રક્ષા અખબારનાં વધુ અપડેટ અને સમાચારો મેળવવા માટે whatsapp ગ્રુપમાં જોડાવો, અહીં કલીક કરો.