‘વસ્તી ગણતરી-૨૦૨૭’ અને ‘જન કલ્યાણ શિબિર’ સંદર્ભે તાપી કલેક્ટર દેવ ચૌધરીના અધ્યક્ષસ્થાને સમીક્ષા બેઠક યોજાઈ
વસ્તી ગણતરી અને જનકલ્યાણ શિબિરના સુચારુ આયોજન માટે રચનાત્મક સૂચનો આપતા કલેક્ટરશ્રી દેવ ચૌધરી
—
શિક્ષણ વિભાગની સમીક્ષા બેઠકમાં જિલ્લાનો એક પણ બાળક શિક્ષણથી વંચિત ન રહે તેના પર વિશેષ ભાર મૂકતા કલેક્ટરશ્રી
—
(માહિતી બ્યુરો દ્વારા, તાપી) : તા. 11 : તાપી જિલ્લા કલેક્ટરશ્રી દેવ ચૌધરીએ કલેક્ટર કચેરીના સભાખંડ ખાતે રાષ્ટ્રીય વસ્તી ગણતરી ૨૦૨૭ અંતર્ગત બેઠક યોજીને જિલ્લામાં વસ્તી ગણતરીની પ્રક્રિયા સમયબદ્ધ અને ક્ષતિરહિત રીતે પૂર્ણ કરવા માટેના પ્રાથમિક માઇક્રો પ્લાનિંગ અંગે સંબંધિત અધિકારીઓ સાથે વિસ્તૃત ચર્ચા કરીને જરૂરી માર્ગદર્શન પૂરું પાડ્યું હતું.
સાથોસાથ કલેક્ટરશ્રી દેવ ચૌધરીએ શિક્ષણ વિભાગની કામગીરીની પણ સમીક્ષા કરી હતી. જિલ્લામાં એક પણ બાળક શિક્ષણથી વંચિત ન રહે તે માટે કલેક્ટરશ્રી દ્વારા ડ્રોપ આઉટ થયેલા બાળકોને શાળાના પટાંગણ સુધી પહોંચાડવા શિક્ષણ વિભાગની સાથે ઉચ્ચ અધિકારીઓ અને વિવિધ વિભાગના અધિકારીઓને પણ સહભાગી થવા રચનાત્મક સુચનો આપી માર્ગદર્શન પુરુ પાડ્યુ હતુ.
તદુપરાંત, કલેક્ટરશ્રીએ જિલ્લામાં છેવાડાના માનવી સુધી સરકારી યોજનાઓના લાભો પહોંચાડવા માટે આયોજિત થનારી ‘જન કલ્યાણ શિબિર’ના સુચારુ આયોજન અંગે પણ વિસ્તૃત સમીક્ષા કરી હતી.
આ બેઠકમાં નિવાસી અધિક કલેક્ટરશ્રી આર.આર. બોરડ સહિત જિલ્લા-તાલુકાના સંબંધિત વિભાગના ઉચ્ચ અધિકારીશ્રીઓ પ્રત્યક્ષ તેમજ તાલુકાના મામલતદારશ્રીઓ તેમજ તાલુકાકક્ષાના અધિકારીઓ વર્ચ્યુઅલ માધ્યમથી ઉપસ્થિત રહ્યા હતા.
000
સૌથી મહત્વપૂર્ણ બાબતથી ચૂકશો નહીં.
👉🏻 ગુજરાત રક્ષા હમણાં જ ડાઉનલોડ કરો અને માહિતીની શક્તિથી સુરક્ષિત રહો !
________________
About The Author
