સુરત જિલ્લાના ઓલપાડ તાલુકાના કોબા પ્રાથમિક શાળામાં ગ્રીનસોલ ફાઉન્ડેશન દ્વારા દફતર અને ચંપલ વિતરણ
(મુકેશ પાડવી દ્વારા, વેલ્દા-નિઝર) : કોબા પ્રાથમિક શાળામાં ગ્રીનસોલ ફાઉન્ડેશનના સંયુક્ત સહયોગથી વિદ્યાર્થીઓ માટે એક પ્રશંસનીય અને પ્રેરણાદાયક કાર્યક્રમનું આયોજન કરવામાં આવ્યું હતું. આ કાર્યક્રમ હેઠળ બાળકોને રિસાયકલ કરેલા સ્કૂલ બેગ, ચપ્પલ અને ચટાઈઓનું વિતરણ કરવામાં આવ્યું, જે પર્યાવરણ સંરક્ષણ સાથે સમાજસેવાનું ઉત્તમ ઉદાહરણ પૂરું પાડે છે.
આ સમગ્ર કાર્યક્રમનું સુચારૂ આયોજન અને સંચાલન શાળાના આચાર્યશ્રી ધર્મેન્દ્ર પટેલ દ્વારા કરવામાં આવ્યું હતું. કાર્યક્રમ દરમિયાન ગામના સરપંચ શ્રી દિલીપભાઈ પટેલ તથા સમાજસેવક અલ્પેશભાઈ પટેલ વિશેષ ઉપસ્થિત રહ્યા હતા. મહાનુભાવોએ પોતાના સંબોધનમાં બાળકોને શિક્ષણ સાથે સ્વચ્છતા અને પર્યાવરણ પ્રત્યે જાગૃત રહેવા પ્રેરણા આપી હતી.
ગ્રીનસોલ ફાઉન્ડેશન દ્વારા આપવામાં આવેલ આ સહાયથી અનેક જરૂરિયાતમંદ વિદ્યાર્થીઓને લાભ મળ્યો છે, જેના કારણે તેઓ વધુ ઉત્સાહ સાથે અભ્યાસ તરફ આગળ વધી શકશે. કાર્યક્રમ દરમિયાન બાળકોમાં ખુશીનો માહોલ જોવા મળ્યો હતો.
આવો કાર્યક્રમ સમાજમાં સહકાર, સેવા અને પર્યાવરણ પ્રત્યેની જવાબદારીનું ઉત્તમ પ્રતિબિંબ છે. અંતે શાળાના સ્ટાફ દ્વારા તમામ મહેમાનોનો આભાર વ્યક્ત કરવામાં આવ્યો હતો.
ગુજરાત રક્ષા અખબારનાં વધુ અપડેટ અને સમાચારો મેળવવા માટે whatsapp ગ્રુપમાં જોડાવો, અહીં કલીક કરો.
About The Author
