પ્રાકૃતિક ખેતી અને રાજ્ય સરકારની સહાયથી કાયાપલટ: નટુભાઈ ગામીતની પ્રેરક સફળતા
રવિ કૃષિ મહોત્સવમાં વન અને પર્યાવરણ મંત્રી સાથે વાર્તાલાપ થયા બાદ મંત્રીએ તેમને આદર્શ ખેડૂત ગણાવ્યા
(પ્રતિનિધિ દ્વારા, વ્યારા) : તા. 14. વ્યારા તાલુકાના શાહપુર ગામના ખેડૂત નટુભાઈ ઠાકોરભાઈ ગામીતની કહાની દર્શાવે છે કે કેવી રીતે પ્રાકૃતિક ખેતી અને રાજ્ય સરકારની કલ્યાણકારી યોજનાઓના સમન્વયથી માત્ર બે વીંઘા જમીન ધરાવતો ખેડૂત પણ સમૃદ્ધિના શિખરો સર કરી શકે છે.
દસ વર્ષ પહેલાં, નટુભાઈની ખેતી (કાંદા-ડાંગર) માંથી આવક માત્ર ઘર ચલાવવા પૂરતી હતી, જેના કારણે આર્થિક તંગી હતી. જોકે, તેમણે પ્રાકૃતિક ખેતી અપનાવીને ભીંડા, રીંગણ અને અન્ય શાકભાજીનું વાવેતર શરૂ કર્યું. આ પદ્ધતિના કારણે આજે તેમની વાર્ષિક આવક ઘરે બેઠા રૂપિયા ૨ લાખ સુધી પહોંચી છે.
નટુભાઈની આર્થિક પ્રગતિમાં સરકારી યોજનાઓએ પાયાનો આધાર પૂરો પાડ્યો. ખેતીની આવક સાથે, તેમણે પોતાના દીકરાને B.Sc. એગ્રીકલ્ચર અને દીકરીને B.E. સિવિલ જેવું મોંઘું શિક્ષણ અપાવ્યું. આમાં તેમને બાળકો માટે મળેલ ફ્રીશીપ કાર્ડનો મોટો લાભ મળ્યો, જેનાથી શિક્ષણનો બોજ હળવો થયો. તેમને પી.એમ. કિસાન સન્માન નિધિનો નિયમિત લાભ મળ્યો, જેણે ખેતીના ખર્ચા અને અન્ય જરૂરિયાતો માટે વધારાની મૂડી પૂરી પાડી. ખેતીની આવકમાંથી તેમણે ટ્રેક્ટર સહિત ટેમ્પો, પ્લેઝર અને સ્પ્લેન્ડર જેવા વાહનો વસાવ્યા છે. સરકારની અન્ય યોજનાઓએ તેમના પરિવારનું જીવનધોરણ સુધાર્યું. રાશન કાર્ડ પર નિયમિતપણે સબસિડીવાળું અનાજ મળ્યું, જેનાથી પરિવારની ભોજન સુરક્ષા સુનિશ્ચિત થઈ.
આ યોજના હેઠળ ગેસની બોટલ મળવાથી તેમને બળતણ માટે લાકડાં પર નિર્ભર રહેવું પડ્યું નહીં, જેનાથી સમય અને શક્તિની બચત થઈ.
નટુભાઈ ગામીત આજે પોતાનું ઉત્પાદન સુરત અને વ્યારામાં આવેલ પ્રાકૃતિક બજારોમાં સીધું વેચીને ન્યાયી ભાવ મેળવી રહ્યા છે. તેમની આ સફળ ગાથા એ વાતનો જીવંત પુરાવો છે કે પ્રાકૃતિક ખેતી અને રાજ્ય સરકારની વિવિધ સહાય યોજનાઓનું સમર્થન એક નાના ખેડૂતનું ભાગ્ય કેવી રીતે બદલી શકે છે.
વધુ અપડેટ અને સમાચારો મેળવવા માટે ગુજરાત રક્ષાના whatsapp ગ્રુપમાં જોડાવો, અહીં ટચ કરો.
About The Author
