તાપી જિલ્લામાં ઉત્સાહપૂર્વક નેશનલ સ્પોર્ટ્સ ડેની ઉજવણી કરાઈ
મેજર ધ્યાનચંદની જન્મજયંતિ નિમિતે વિવિધ શાળા- કોલેજોમાં રમત સ્પર્ધાઓ અને સન્માન સમારોહ યોજાયો
(પ્રતિનિધિ દ્વારા, વ્યારા) : તા.૨૯. ૨૯ ઑગસ્ટ મેજર ધ્યાનચંદની જન્મજયંતિ નિમિતે તાપી જિલ્લામાં સ્પોર્ટ્સ ઓથોરિટી ઓફ ગુજરાત તથા જિલ્લા વહીવટી તંત્ર દ્વારા નેશનલ સ્પોર્ટ્સ ડે ની ઉત્સાહપૂર્વક ઉજવણી કરવામાં આવી હતી. જિલ્લા સ્પોર્ટ્સ કોમ્પ્લેક્ષ, સિનિયર સિટીઝન ક્લબ, સ.ગો. હાઈસ્કુલ વાલોડ તથા જિલ્લાના વિવિધ શાળાઓ-કોલેજોમાં વિવિધ રમતો અને સ્પર્ધાઓ યોજાઈ હતી.
જિલ્લા કલેકટર ડૉ. વિપિન ગર્ગ તથા નગરપાલિકા વ્યારાના બાંધકામ સમિતિના ચેરમેન શ્રી મૃણાલભાઈ જોષી જિલ્લા સ્પોર્ટ્સ કોમ્પ્લેક્ષ ખાતે આયોજિત કાર્યક્રમમાં વિશેષ ઉપસ્થિતિ નોંધાવી રમતવીરોને પ્રોત્સાહન પૂરું પાડી રમતક્ષેત્રે ઉત્તરોત્તર પ્રગતિ કરવા શુભેચ્છાઓ પાઠવી હતી.
આ પ્રસંગે કલેકટરશ્રીના હસ્તે પ્રથમ ખો ખો વર્લ્ડ કપ પ્રિ-નેશનલ કેમ્પમાં પસંદ થયેલી તાપીની ખેલાડી કુ. પ્રિયા ચૌધરી સહિત જિલ્લાના વિવિધ રમતવીરો ને સન્માન કરવામાં આવ્યા હતા.
જિલ્લા સ્પોર્ટ્સ કોમ્પ્લેક્ષ ખાતે આયોજિત કાર્યક્રમમાં તાપી જિલ્લાના પેરા એથલેટ્સે પણ ઉત્સાહપૂર્વક ભાગ લીધો હતો.
વધુમાં વ્યારા નગરપાલિકાના સિનિયર સિટીઝન ક્લબ ખાતે વ્યારાના વડીલ નાગરિકોએ વિવિધ રમતો રમીને આ દિવસને યાદગાર બનાવ્યો હતો. રમતોમાં સક્રિય ભાગ લઈને સિનિયર સિટીઝનોએ રમતગમત પ્રત્યેનો ઉમંગ અને તંદુરસ્ત જીવનશૈલીનું મહત્વ વ્યક્ત કર્યું હતું.
આ અવસરે હોકી, કુસ્તી, ટેબલ ટેનિસ, બેડમિન્ટન, કબડ્ડી, પ્લેન્ક ચેલેન્જ, દોરડા કૂદ, કેરમ તથા સંગીત ખુરશી જેવી રમતોનું આયોજન કરવામાં આવ્યું હતું. અંદાજિત ૭૮૦ જેટલા રમતપ્રેમીઓએ આ રમતોમાં ઉત્સાહભેર ભાગ લીધો હતો.
વધુ અપડેટ અને સમાચારો મેળવવા માટે ગુજરાત રક્ષાના whatsapp ગ્રુપમાં જોડાવો, અહીં ટચ કરો.
About The Author
