સાસુ-વહુ વચ્ચેના પારિવારિક વિવાદનું 181 અભયમ્ ટીમે કરાવ્યું સુખદ સમાધાન

(પ્રતિનિધિ દ્વારા, વ્યારા) : તા. ૩૦. સુરત શહેરના સચીન વિસ્તારમાં સાસુ-વહુ વચ્ચે ઊભા થયેલા પારિવારિક મતભેદને પગલે એક મહિલાએ 181 અભયમ્ મહિલા હેલ્પલાઇનનો સંપર્ક કરી મદદ માગી હતી. મહિલાની રજૂઆતને ગંભીરતાથી લઈ ઉમરા 181 અભયમ્ ટીમે તાત્કાલિક સ્થળ પર પહોંચી પરિસ્થિતિનું મૂલ્યાંકન કર્યું હતું. ટીમના કાઉન્સેલરે બંને પક્ષો સાથે સંવેદનશીલતાપૂર્વક વાતચીત કરી, તેમની રજૂઆતો સાંભળી અને યોગ્ય માર્ગદર્શન આપીને પારિવારિક વિવાદનો શાંતિપૂર્ણ ઉકેલ લાવવામાં મહત્વપૂર્ણ ભૂમિકા ભજવી હતી.

પ્રાપ્ત માહિતી અનુસાર, સંબંધિત મહિલા તેમના પરિવાર સાથે સચીન વિસ્તારમાં રહે છે. પરિવારમાં પતિ, બે પુત્રો અને પુત્રવધૂ સહિત પાંચ સભ્યો રહે છે. મોટા પુત્રનાં લગ્નને આશરે આઠ મહિના થયાં છે. પુત્રવધૂ અલગ સામાજિક અને પારિવારિક પૃષ્ઠભૂમિ ધરાવતી હોવાથી બંને પરિવારની રીત-રિવાજો અને પરંપરાઓમાં તફાવત હોવાનું મહિલાએ જણાવ્યું હતું. મહિલાના જણાવ્યા મુજબ, ઘરના રોજિંદા વ્યવહાર અને વિવિધ બાબતોને લઈને સાસુ-વહુ વચ્ચે અવારનવાર મતભેદ થતા હતા. આ મતભેદોને કારણે ઘરમાં બોલાચાલી અને પરસ્પર મનદુઃખની પરિસ્થિતિ ઊભી થતી હતી. આથી મહિલાએ 181 અભયમ્ હેલ્પલાઇનની મદદ માગી હતી.

મહિલાની મદદ માટેની રજૂઆત મળતાં જ ઉમરા 181 અભયમ્ ટીમે તાત્કાલિક પ્રતિસાદ આપી સ્થળ પર પહોંચી હતી. ટીમના કાઉન્સેલરે સૌપ્રથમ મહિલા સાથે સંવેદનશીલતાપૂર્વક વાતચીત કરી તેમની સમસ્યા, માનસિક પરિસ્થિતિ અને પારિવારિક વિવાદનાં કારણો સમજવાનો પ્રયાસ કર્યો હતો.

ત્યારબાદ પુત્રવધૂ સાથે પણ અલગથી વાતચીત કરી તેમની રજૂઆત અને દૃષ્ટિકોણ જાણવામાં આવ્યો હતો. બંને પક્ષોની વાતને નિષ્પક્ષ રીતે સાંભળી કાઉન્સેલરે પારિવારિક સંબંધોમાં ઊભા થયેલા મતભેદોનાં કારણો સમજવાનો પ્રયાસ કર્યો હતો.

કાઉન્સેલરે બંને પક્ષોનું જરૂરિયાત મુજબ અલગ-અલગ તેમજ સંયુક્ત કાઉન્સેલિંગ કર્યું હતું. આ દરમિયાન બંનેને પોતાની વાત રજૂ કરવાની તક આપી હતી. કાઉન્સેલરે સમજાવ્યું હતું કે લગ્ન બાદ અલગ-અલગ પારિવારિક વાતાવરણ અને રીત-રિવાજોમાંથી આવતી વ્યક્તિઓને એકબીજાની જીવનશૈલી અને પરંપરાઓ સમજવામાં સમય લાગી શકે છે. તેથી એકબીજાની લાગણીઓ, વિચારો અને પારિવારિક પૃષ્ઠભૂમિનો આદર કરવો જરૂરી છે.

ખાસ કરીને સાસુને સમજાવવામાં આવ્યું હતું કે પુત્રવધૂ અલગ સામાજિક અને પારિવારિક પૃષ્ઠભૂમિમાંથી આવતી હોવાથી તેને નવા પરિવારના વાતાવરણ અને રીત-રિવાજો સાથે અનુકૂળ થવા માટે સમય અને સહકાર આપવો જોઈએ. તેવી જ રીતે પુત્રવધૂને પણ પરિવારના સભ્યોની લાગણીઓ અને પરસ્પર આદર જાળવીને સંવાદ દ્વારા પ્રશ્નોનો ઉકેલ લાવવા સમજાવવામાં આવ્યું હતું.

કાઉન્સેલરે મહિલાને મહિલાઓના કાયદાકીય અધિકારો અંગે સરળ ભાષામાં સમજ આપી હતી. ખાસ કરીને ઘરેલુ હિંસાથી મહિલાઓનું રક્ષણ અધિનિયમ, 2005 અંગે માહિતી આપતાં સમજાવ્યું હતું કે આ કાયદા હેઠળ શારીરિક, મૌખિક, ભાવનાત્મક અને આર્થિક દુર્વ્યવહાર સામે કાયદાકીય રક્ષણની જોગવાઈ કરવામાં આવી છે.

સાથે જ મહિલાને સમજાવવામાં આવ્યું હતું કે કોઈપણ પ્રકારની હિંસા કે ઉત્પીડનની પરિસ્થિતિમાં તેઓ યોગ્ય કાયદાકીય સહાય અને રક્ષણ મેળવી શકે છે. જરૂરિયાત મુજબ સંબંધિત સત્તાધિકારીનો સંપર્ક કરી શકાય છે. કાઉન્સેલરે બંને પક્ષોને પરસ્પર આદર, સંયમ અને કાયદાનું પાલન કરીને પારિવારિક પ્રશ્નોનો ઉકેલ લાવવા માર્ગદર્શન આપ્યું હતું.

181 અભયમ્ ટીમના કાઉન્સેલિંગ અને માર્ગદર્શન બાદ બંને પક્ષોને એકબીજાની પરિસ્થિતિ અને લાગણીઓ સમજવામાં મદદ મળી હતી. અલગ-અલગ પારિવારિક રીત-રિવાજો અને જીવનશૈલીને કારણે એકબીજાને સમજવામાં સમય લાગતો હોવાનું બંને પક્ષોએ સ્વીકાર્યું હતું.

બંને પક્ષો વચ્ચે ખુલ્લા સંવાદ અને પરસ્પર સમજણ કેળવાતાં મતભેદો દૂર થયા હતા. બંનેએ ભવિષ્યમાં એકબીજાની લાગણીઓ અને સ્વાભિમાનનું સન્માન રાખી શાંતિપૂર્ણ વાતાવરણમાં રાજીખુશીથી સાથે રહેવાની સંમતિ દર્શાવી હતી.

આમ, ઉમરા 181 અભયમ્ ટીમે સમયસર સ્થળ પર પહોંચી નિષ્પક્ષ કાઉન્સેલિંગ, સંવેદનશીલ અભિગમ અને કાયદાકીય માર્ગદર્શન દ્વારા સાસુ-વહુ વચ્ચેના પારિવારિક વિવાદનું સુખદ સમાધાન કરાવવામાં સફળ કામગીરી કરી હતી.

○○○