181 અભયમ મહિલા હેલ્પલાઇનની સમયસર મદદથી 20 વર્ષીય યુવતીનું પરિવાર સાથે સુરક્ષિત પુનઃમિલન
Contact News Publisher
181 અભયમ ટીમ દ્વારા યુવતીને કાઉન્સેલિંગ, કાયદાકીય માર્ગદર્શન અને જરૂરી સહાય પૂરી પાડી સુરક્ષિત રીતે પરિવાર સુધી પહોંચાડવામાં આવી
(પ્રતિનિધિ દ્વારા, સુરત) : ત. ૩૦. સુરત શહેરના રેલવે સ્ટેશન ખાતે આશ્રય અને મદદની જરૂરિયાત ધરાવતી 20 વર્ષીય યુવતીને 181 અભયમ મહિલા હેલ્પલાઇનની ટીમ દ્વારા સમયસર મદદ પૂરી પાડી યોગ્ય કાઉન્સેલિંગ અને માર્ગદર્શન આપીને સુરક્ષિત રીતે પરિવાર સાથે પુનઃમિલન કરાવવામાં આવ્યું હતું.
પ્રાપ્ત માહિતી અનુસાર, સુરત રેલવે સ્ટેશન ખાતે એક યુવતી મુશ્કેલીની પરિસ્થિતિમાં હોવાનું ધ્યાનમાં આવતાં એક જાગૃત નાગરિક દ્વારા 181 અભયમ મહિલા હેલ્પલાઇન પર સંપર્ક કરવામાં આવ્યો હતો. યુવતીને આશ્રયની જરૂરિયાત હોવાથી જરૂરી મદદ પૂરી પાડવા વિનંતી કરવામાં આવી હતી.
માહિતી મળતાં જ 181 અભયમ કતારગામની ટીમ તાત્કાલિક સુરત રેલવે સ્ટેશન ખાતે પહોંચી હતી. ત્યાં યુવતી (નામ બદલેલ છે – રૂબીના) મળી આવી હતી. યુવતીએ પોતાની ઉંમર 20 વર્ષ અને વરિયાળી બજાર, સુરત ખાતે રહેતી હોવાનું જણાવ્યું હતું.
યુવતીના જણાવ્યા અનુસાર, તા. 29/10/2026ના રોજ સવારે આશરે 8 વાગ્યે તેઓ ઘરેથી નીકળીને સુરત રેલવે સ્ટેશન ખાતે આવ્યા હતા. છેલ્લા એક મહિનાથી ઇન્સ્ટાગ્રામ મારફતે દિલ્હી ખાતે રહેતા એક યુવક સાથે તેમની વાતચીત થતી હતી. યુવક તેમને લેવા માટે દિલ્હીથી સુરત આવવાનો હોવાનું જણાવ્યું હતું. જોકે, યુવક રેલવે સ્ટેશન ખાતે આવ્યો ન હતો. ત્યારબાદ યુવકનો મોબાઇલ ફોન પણ બંધ આવતો હોવાથી યુવતી મુશ્કેલીની પરિસ્થિતિમાં મુકાઈ હતી. આ ઉપરાંત, યુવતીએ પરિવાર સાથેના કેટલાક પ્રશ્નો અંગે પણ પોતાની રજૂઆત કરી હતી.
આ પરિસ્થિતિને ધ્યાનમાં રાખીને 181 અભયમની કાઉન્સેલર દ્વારા યુવતી સાથે શાંતિપૂર્ણ અને સંવેદનશીલ રીતે વાતચીત કરવામાં આવી હતી. યુવતીની રજૂઆત ધીરજપૂર્વક સાંભળીને તેમને માનસિક સધિયારો આપવામાં આવ્યો હતો. સાથે જ તેમની સુરક્ષા, વ્યક્તિગત સ્વતંત્રતા અને કાયદાકીય અધિકારો અંગે સરળ ભાષામાં સમજણ આપવામાં આવી હતી.
યુવતીને જરૂરિયાતના સમયે ઉપલબ્ધ આશ્રયગૃહની સુવિધા અને ત્યાં મળતી સહાય અંગે પણ માહિતી આપવામાં આવી હતી. ત્યારબાદ યુવતીની સંમતિથી તેમના પરિવારજનોનો સંપર્ક કરવામાં આવ્યો હતો અને સમગ્ર પરિસ્થિતિ અંગે જાણ કરવામાં આવી હતી.
થોડા સમય બાદ યુવતીના પરિવારજનો તેમને લેવા માટે રેલવે સ્ટેશન ખાતે આવ્યા હતા. આ દરમિયાન 181 અભયમની ટીમ દ્વારા યુવતીના ભાઈ સાથે પણ કાઉન્સેલિંગ કરવામાં આવ્યું હતું. યુવતીની લાગણીઓ, સુરક્ષા, વ્યક્તિગત સ્વતંત્રતા અને પરિવારના સભ્ય તરીકે તેમની સાથે સંવેદનશીલતાપૂર્વક વર્તન કરવા અંગે જરૂરી સમજણ આપવામાં આવી હતી.
આમ, 181 અભયમ મહિલા હેલ્પલાઇનની ટીમ દ્વારા યોગ્ય કાઉન્સેલિંગ, કાયદાકીય માર્ગદર્શન અને પરિવાર સાથે સંકલન કરીને યુવતીને સુરક્ષિત રીતે તેમના પરિવારજનોને સોંપવામાં આવી હતી.
યુવતીને સુરક્ષિત રીતે પરિવાર સાથે પુનઃમિલન કરાવવામાં 181 અભયમ મહિલા હેલ્પલાઇનની ટીમ દ્વારા કરવામાં આવેલી સમયસર મદદ, સંવેદનશીલ કાઉન્સેલિંગ અને યોગ્ય માર્ગદર્શન બદલ યુવતીના ભાઈએ ટીમનો હૃદયપૂર્વક આભાર વ્યક્ત કર્યો હતો. મુશ્કેલીના સમયે 181 અભયમ ટીમ દ્વારા મળેલી સહાય અને સહકારની તેમણે પ્રશંસા કરી હતી. આ સાથે ટીમ દ્વારા પરિવારજનોને 181 અભયમ મહિલા હેલ્પલાઇનની સેવાઓ અંગે પણ માહિતી આપવામાં આવી હતી.
○○○
About The Author
