સરકારી પ્રાથમિક શાળાનાં વિદ્યાર્થીઓને શિષ્યવૃત્તિ મેળવવી લોઢાનાં ચણા ચાવવા સમાન
સરકારી પ્રાથમિક શાળામાં અભ્યાસ કરતાં વિદ્યાર્થીઓ માટે શિષ્યવૃત્તિ મેળવવા સાત કોઠા વીંધવા જેવું કઠિન કામ
શિષ્યવૃત્તિની દરખાસ્ત કરવા માટે અનેકવિધ ડોક્યુમેન્ટ માંગતા હોવાથી કંટાળીને વાલીઓ શિષ્યવૃત્તિ લેવાની ના પાડવા લાગ્યા
(પ્રતિનિધિ દ્વારા, ઓલપાડ) : સુરત જિલ્લા પ્રાથમિક શિક્ષક સંઘનાં પ્રમુખ કિરીટભાઈ પટેલ પાસેથી મળતી માહિતી મુજબ સરકારી પ્રાથમિક શાળામાં અભ્યાસ કરતાં ધો.1 થી 5 નાં વિદ્યાર્થીઓને 1650 રૂપિયા અને ધો.6 થી 8 નાં વિદ્યાર્થીઓને 1950 રૂપિયા શિષ્યવૃત્તિ આપવામાં આવે છે. જેની ડીજીટલ ગુજરાત પોર્ટલ પર દરખાસ્ત કરવાની હોય છે. એ દરખાસ્ત કરવા માટે સૌથી પહેલાં વિદ્યાર્થીનું બેંક ખાતું હોવું જોઈએ, બેંક ખાતું ખોલવા માટે આધારકાર્ડ હોવું ફરજીયાત છે. વિદ્યાર્થી અને અને વાલી આધારકાર્ડ કઢાવવા માટે ધક્કા ખાધા પછી લાઈનમાં ઉભા રહ્યાં બાદ મહા મુસીબતે આધારકાર્ડ કઢાવે છે ત્યારબાદ ખાતું ખોલવા માટે બેંકોનાં ધક્કા ખાય છે અને બેંક બાળકનું ખોલી આપતી નથી. ઘણાં બધાં પ્રયત્નો પછી વિદ્યાર્થી મિનિમમ રકમ બેંકમાં ડિપોઝીટ રાખે ત્યારે ખાતું ખોલી આપે. ત્યારબાદ શાળા કક્ષાએ ડીજીટલ પોર્ટલમાં દરખાસ્ત કરવા આવકનો દાખલો કઢાવવાનો જાતિનો દાખલો કઢાવવાનો ત્યારબાદ શાળાનાં આચાર્ય દરખાસ્ત કરે જેમાં વિદ્યાર્થીનું ધોરણ, પૂરું નામ, માતાનું નામ જન્મતારીખ, જિલ્લો, તાલુકો, વસાહત, ઘરનું સરનામું, પીનકોડ માતા-પિતાનો વ્યવસાય, કોમ્યુનિટી કાસ્ટ, ધર્મ, શારીરિક ખોડખાંપણ, કુંટુંબની આવક વાલીનો મોબાઈલ નંબર, વિદ્યાર્થીનાં ટકા, હાજર દિવસ, બીપીએલ નંબર, વિદ્યાર્થીનું આધાર સ્ટેટ, આધાર નંબર રેશનકાર્ડ નંબર, આધાર kyc બેંક ડિટેઈલ IFSC કોડ, બેંક એકાઉન્ટ નંબર વગેરે વિગતો અપલોડ કરવાની થાય છે. જો આધારકાર્ડ અપડેટ હોય, રેશનકાર્ડ સાથે આધારકાર્ડ લિંક હોય તો અને તો જ દરખાસ્ત સબમિટ થાય છે નહીંતર થતી નથી. ગુજરાત ડીજીટલ સાઈટ ખૂબજ ધીમી ચાલતી હોય વારંવાર એરર આવતી હોય, વહેલી સવારે જાગીને શિષ્યવૃત્તિ દરખાસ્ત કરીએ ત્યારે એક કલાકમાં માંડ 10 જેટલી એન્ટ્રી થઈ શકે અત્યાર સુધીમાં માંડ 40 થી 50 બાળકોની દરખાસ્ત થયેલ છે, એમાં વળી e-kyc ન હોય તો દરખાસ્ત થતી નથી. e-kyc કરવા માટેની પ્રક્રિયા પણ ખૂબજ જટિલ છે, જેમાં PDS+ એપ્લિકેશનમાં શિક્ષકો એપ ઓપન કરે એટલે વિદ્યાર્થીનાં કે વાલીનાં મોબાઈલમાં OTP આવે. OTP શિક્ષક વાલી પાસે માંગે, વાલી OTP આપે OTP જનરેટ કરે ત્યારે આધાર કેવાયસી કરે. સૂચનાઓ વાંચી, રેશનકાર્ડ નંબર દાખલ કરવા રેશનકાર્ડ દાખલ કરે એટલે ફરી પાછો વાલીનાં મોબાઈલ નંબરમાં OTP આવે. શિક્ષક OTP માંગે, OTP દાખલ કરવાનો ત્યારબાદ રેશનકાર્ડમાં જેટલાં મેમ્બર હોય એટલાં દેખાય, એમાં જે વિદ્યાર્થીનું e-kyc બાકી હોય એનાં નામ પર ટીક કરીને ફોટો કેપ્ચર કરવાનો, ફોટો કેપ્ચર કરવા ફરી પાછો OTP આવે એ OTP વાલી પાસે માંગીને અપલોડ કરવો પડે, ત્યારબાદ ફોટો કેપ્ચર કરવામાં પણ સમય લાગે છે. ફોટો કેપ્ચર થયા બાદ વિદ્યાર્થીની આધાર ડિટેઈલ ખુલે એમાં ટીક કરી સબમિટ ફોર એપૃવલ આપીએ ત્યારે e-kyc પૂરું થાય અને ત્યારબાદ વિદ્યાર્થીની શિષ્યવૃત્તિની દરખાસ્ત સબમિટ થાય. આટલી બધી પ્રક્રિયા વાલીઓ પોતાનાં કામનાં ભોગે, મજૂરીનાં ભોગે કરવી પડતી હોય, ઘણાં બધાં વાલીઓ કંટાળીને કહે છે કે રહેવા દો સાહેબ મારે શિષ્યવૃત્તિ નથી જોઈતી. આમ, માત્ર 1650 રૂપિયા જેટલી નજીવી શિષ્યવૃત્તિ પ્રાપ્ત કરવા સાત કોઠા વીંધવા જેવું કામ કરવું પડતું હોય છે.
બધેથી એવો સૂર ઉઠ્યો છે કે જો ખરેખર સરકારને શિષ્યવૃત્તિ આપવી જ હોય અને એ માટેની પ્રક્રિયા સરળ કરવી હોય તો આટલું નાનું ફોર્મેટ જ રાખવું જોઈએ. ક્રમ, વિદ્યાર્થીનું નામ, બેંક ખાતા નંબર, બેંક, IFSC કોડ, જમા આપવાની રકમ. જે શિષ્યવૃત્તિનો હેતુ વિદ્યાર્થીને ભણતરમાં મદદરૂપ થવાનો હતો એનો આખો હેતુ જ માર્યો ગયો. હવે શિષ્યવૃત્તિનાં લીધે વિદ્યાર્થીઓનું ભણતર બગડે એવી નોબત આવી ગઈ છે. માટે શિષ્યવૃત્તિ પ્રાપ્ત કરવી એ લોઢાનાં ચણા ચાવવા જેવું અઘરું કામ થઈ ગયું છે.
વધુ અપડેટ અને સમાચારો મેળવવા માટે ગુજરાત રક્ષાના whatsapp ગ્રુપમાં જોડાવો, અહીં ટચ કરો.
About The Author
