વ્યારા એ.પી.એમ.સી.માં ભગવો લહેરાયો
(પ્રતિનિધિ દ્વારા, વ્યારા) : વ્યારા એપીએમસીના યોજાયેલ ચૂંટણીમાં ભાજપ સમર્થિત પેનલના ઉમેદવારોનો ભવ્ય વિજય થતાં ભાજપના શુભેચ્છકો- ટેકેદારોમાં આનંદની લહેર પ્રસરી ગઈ હતી. પાર્ટીના મેન્ડેટ મુજબ ભાજપે ઉમેદવારોની પસંદગી કરી ચૂંટણી જંગમાં ઝંપલાવ્યું હતું. આ ચૂંટણીની મતગણતરી થતાં જ ખેડૂત મત વિભાગમાંથી તમામ ૧૦ જેટલા ભાજપ સમર્થિત પેનલના ઉમેદવારો વિજેતા બન્યા હતા. તેમજ વેપારી મત વિભાગમાંથી પણ ભાજપના ચારેય ઉમેદવારોનો ભવ્ય વિજય થયો હતો. જયારે ખરીદ-વેચાણ સંઘની બે બેઠક કોંગ્રેસને ફાળે ગઈ હતી. આમ આ ચૂંટણીમાં ભાજપે બાજી મારીને વિજય પતાકા લહેરાવી હતી. તાપી જિલ્લા ભાજપ પ્રમુખ મયંક જોશી, જિલ્લા પ્રભારી માધુભાઈ કથીરીયા તથા ધારાસભ્ય મોહન કોંકણીની આગેવાની હેઠળ આ ચૂંટણીમાં ભાજપે ભવ્ય સફળતા હાંસલ કરી હતી. મયંક જોશી તાપી જિલ્લાના પ્રમુખ બન્યા બાદ તેમના નેતૃત્વ હેઠળ મળેલા પ્રથમ વિજયને લોકોએ ઉમળકાભેર વધાવી શુભેચ્છા પાઠવી હતી. કુલીન પ્રધાન, વિક્રમ તરસાડિયા વિજયોત્સવમાં હાજર હતા.
About The Author
