ગુજરાત રાજ્ય નાગરિક પુરવઠા નિગમ લિ. નાં સેવક જેરામભાઇ ગોહિલનો વિદાય સમારંભ યોજાયો
(પ્રતિનિધિ દ્વારા, સુરત) : ગુજરાત રાજ્ય નાગરિક પુરવઠા નિગમ લિ. ની જિલ્લા કચેરીમાં છેલ્લા 40 વર્ષથી સેવક તરીકે ખૂબ જ નિષ્ઠાપૂર્વક ફરજ બજાવી નિવૃત્ત થયેલ જેરામભાઇ ટાભજીભાઈ ગોહિલનો વિદાય સમારંભ ઉમિયાધામ મંદિર, વરાછા રોડ ખાતે યોજવામાં આવ્યો હતો.
કચેરીનાં વડા એવાં નાયબ જિલ્લા મેનેજર નરેશભાઈ પટેલમાં અધ્યક્ષસ્થાને યોજાયેલ આ સમારંભમાં અન્ય કર્મચારીગણ, જેરામભાઈ ગોહિલનાં શુભેચ્છકો તથા પરિવારજનો ઉપસ્થિત રહ્યા હતા. આ પ્રસંગે નાયબ જિલ્લા મેનેજર નરેશભાઈ પટેલે જેરામભાઈની ફરજનિષ્ઠા, કૌટુંબિક ભાવના, વફાદારી, સમયપાલન જેવાં ગુણોની સરાહના કરી તેમનાં સેવાકાળને બિરદાવ્યો હતો. આ સાથે ઓલપાડનાં ગોડાઉન મેનેજર રસિકભાઈ દેસાઈએ પોતાનાં ઉદબોધનમાં જેરામભાઈ ગોહિલને તેમનાં શેષ જીવન માટે શુભેચ્છા પાઠવી હતી.
કચેરીનાં સમગ્ર કર્મચારીગણે જેરામભાઈ ગોહિલને શાલ ઓઢાડી સ્મૃતિભેટ અર્પણ કરી સન્માનિત કર્યા હતા. આ તકે પોતાનો પ્રતિભાવ આપતાં જેરામભાઈ ગોહિલ ગદગદિત થયા હતા. કાર્યક્રમને અંતે સચિનનાં ગોડાઉન મેનેજર કૌશિક પટેલે આભારવિધિ આટોપી હતી.
About The Author
