નેટવર્ક ચેતવણી સંકેતને ઓળખો અને ‘સિમ સ્વેપ ફ્રોડ’થી બચો : સાયબર સુરક્ષા માટે તાત્કાલિક સાવચેતી જરૂરી

(માહિતી બ્યુરો, ગાંધીનગર) : તા. ૧૧. આજના ડિજિટલ યુગમાં ઓનલાઈન બેંકિંગ, યુપીઆઈ, સોશિયલ મીડિયા અને વિવિધ સરકારી-ખાનગી સેવાઓ મોબાઇલ નંબર સાથે જોડાયેલી હોવાથી સાયબર ગુનેગારો દ્વારા નવી-નવી છેતરપિંડીની પદ્ધતિઓ અપનાવવામાં આવી રહી છે. આવી જ એક ગંભીર સાયબર છેતરપિંડી છે ‘સિમ સ્વેપ ફ્રોડ’, જેમાં ગુનેગારો વ્યક્તિના મોબાઇલ નંબરનું નિયંત્રણ મેળવી તેમના બેંક ખાતા અને અન્ય ડિજિટલ સેવાઓમાં ગેરકાયદેસર પ્રવેશ મેળવે છે.

સાયબર સુરક્ષા નિષ્ણાતોના જણાવ્યા મુજબ, જો અચાનક મોબાઇલ ફોનમાં નેટવર્ક બંધ થઈ જાય, કોલ અથવા મેસેજ આવવાનું બંધ થઈ જાય, અથવા લાંબા સમય સુધી “No Service” કે “Emergency Calls Only” જેવા સંકેતો દેખાવા લાગે તો તેને સામાન્ય ટેક્નિકલ ખામી માનીને અવગણવું નહીં. આવા સંકેતો સિમ સ્વેપ ફ્રોડનો પ્રારંભિક ઈશારો હોઈ શકે છે.

સાયબર ગુનેગારો વિવિધ માધ્યમો દ્વારા વ્યક્તિગત માહિતી એકત્ર કરીને મોબાઇલ સેવા પ્રદાતા કંપની પાસે નકલી ઓળખના આધારે નવા સિમ કાર્ડની માંગણી કરે છે. એકવાર નવું સિમ સક્રિય થઈ જાય પછી મૂળ સિમ બંધ થઈ જાય છે અને ગુનેગારોને OTP, બેંકિંગ વેરિફિકેશન કોડ અને અન્ય મહત્વપૂર્ણ માહિતી મળવા લાગે છે. ત્યારબાદ તેઓ બેંક ખાતામાંથી નાણાંની ચોરી કરી શકે છે.

નાગરિકોને સલાહ આપવામાં આવી છે કે જો મોબાઇલમાં અચાનક નેટવર્ક ગુમ થઈ જાય તો તાત્કાલિક પોતાના મોબાઇલ સેવા પ્રદાતાનો સંપર્ક કરવો, બેંક ખાતાઓની તપાસ કરવી અને જરૂરી હોય તો ઓનલાઈન બેંકિંગ તથા યુપીઆઈ સેવાઓને અસ્થાયી રીતે બંધ કરાવવી. કોઈ અજાણ્યા વ્યક્તિ સાથે OTP, બેંક વિગતો અથવા વ્યક્તિગત માહિતી શેર કરવી નહીં.

સાયબર ક્રાઈમ સામે સુરક્ષા માટે મોબાઇલ નંબર સાથે જોડાયેલા તમામ એકાઉન્ટ્સમાં મજબૂત પાસવર્ડ અને દ્વિ-સ્તરીય સુરક્ષા (Two-Factor Authentication)નો ઉપયોગ કરવો જરૂરી છે. શંકાસ્પદ પ્રવૃત્તિ જણાય તો તાત્કાલિક 1930 સાયબર હેલ્પલાઈન પર સંપર્ક કરવો અથવા National Cyber Crime Reporting Portal પર ફરિયાદ નોંધાવવી.

સાયબર સુરક્ષા એ દરેક નાગરિકની જવાબદારી છે. નેટવર્ક સંબંધિત અસામાન્ય સંકેતોને સમયસર ઓળખીને અને યોગ્ય પગલાં લઈને ‘સિમ સ્વેપ ફ્રોડ’ જેવી ગંભીર છેતરપિંડીથી બચી શકાય છે.

○○○

સૌથી મહત્વપૂર્ણ બાબતથી ચૂકશો નહીં.

👉🏻 ગુજરાત રક્ષા હમણાં જ ડાઉનલોડ કરો અને માહિતીની શક્તિથી સુરક્ષિત રહો !

________________