ઓલપાડની કીમ પ્રાથમિક શાળાનાં શિક્ષિકા સુધાબેન પટેલનો વિદાય સમારંભ યોજાયો
(પ્રતિનિધિ દ્વારા, ઓલપાડ) : ઓલપાડ તાલુકાની જિલ્લા પંચાયત શિક્ષણ સમિતિ સંચાલિત કીમ પ્રાથમિક શાળામાં પ્રાથમિક શાળામાં ફરજ બજાવતાં શિક્ષિકા શ્રીમતી સુધાબેન ગોપાળભાઈ પટેલ વય મર્યાદાનાં કારણે સેવા નિવૃત્ત થતાં તેમનો વિદાય સન્માન કાર્યક્રમ યોજવામાં આવ્યો હતો. સદર કાર્યક્રમમાં કીમનાં સી.આર.સી. કો-ઓર્ડિનેટર અશોક પટેલ, વડોલીનાં કેન્દ્વાચાર્ય પરેશ પટેલ, જિલ્લા પ્રાથમિક શિક્ષક સંઘનાં પ્રતિનિધિ ભૂપેન્દ્ર પટેલ, તાલુકા પ્રાથમિક શિક્ષક સંઘનાં પ્રતિનિધિ સતિષ પરમાર, કીમ કેન્દ્રનાં તમામ શિક્ષકો, શાળા વ્યવસ્થાપન સમિતિનાં સભ્યો તથા વાલીજનો ઉપસ્થિત રહ્યાં હતાં.
આ પ્રસંગે શાળાનાં આચાર્ય દિનેશ પટેલ સહિત સ્ટાફગણે નિષ્ઠાપૂર્વક સેવા બજાવી નિવૃત્ત થતાં આ શિક્ષિકાબેનને શાલ ઓઢાડી સન્માનપત્ર તથા મોમેન્ટો અર્પણ કરી હસતાં મુખે વિદાય આપી હતી. આ તકે સુધાબેન પોતાનાં કાર્યકાળનાં સંસ્મરણો વાગોળતાં અશ્રુભીના થયા હતાં. ઉપસ્થિત મહેમાનોએ પોતપોતાનાં ઉદબોધનમાં વિદાય લેતાં શિક્ષિકાબેનને સુખ, સમૃદ્ધિ તથા નિરામય જીવનની શુભેચ્છાઓ પાઠવી હતી. સમગ્ર કાર્યક્રમનું સંચાલન શાળાનાં ઉપશિક્ષિકા રીટા ખેર તથા નીશા પાટણવાડિયાએ સંયુક્તપણે કર્યુ હતું. એમ પ્રચાર-પ્રસાર પ્રતિનિધિ વિજય પટેલ એક અખબારી યાદીમાં જણાવે છે.
About The Author
