દરરોજના ઝઘડા અને માનસિક ત્રાસથી પરેશાન મહિલાએ પતિને સમજાવવા માટે અભયમ 181ની મદદ લીધી

(પ્રતિનિધિ દ્વારા, વ્યારા) : તા. ૨૭. તાપી જિલ્લામાં પતિના વ્યસન, વારંવારના ઝઘડા અને માનસિક ત્રાસથી પરેશાન થયેલી એક મહિલાએ પોતાના પતિને સમજાવી પરિવારનું વાતાવરણ શાંતિપૂર્ણ બનાવવા માટે અભયમ 181 મહિલા હેલ્પલાઇનમાં મદદ માટે કોલ કર્યો હતો. કોલ મળતાં જ તાપી અભયમ 181 રેસ્ક્યુ ટીમે તાત્કાલિક સ્થળ પર પહોંચી મહિલાની વાત સાંભળી પરિસ્થિતિનું મૂલ્યાંકન કરી જરૂરી કાઉન્સેલિંગ અને માર્ગદર્શનની કામગીરી હાથ ધરી હતી.

મળતી માહિતી મુજબ, મહિલાએ પોતાના પતિ સાથે પ્રેમલગ્ન કર્યા હતા અને તેમના લગ્નજીવનને આશરે 10 વર્ષ થયા છે. પતિ શાકભાજી વેચવાનું કામ કરે છે, જ્યારે મહિલા ઘરકામની સાથે આશાવર્કર તરીકે ફરજ બજાવે છે.

મહિલાના જણાવ્યા મુજબ, તેમના પતિ વ્યસન કરીને ઘરે આવ્યા બાદ નાની-નાની બાબતોમાં ઝઘડો કરતા હતા. પતિ તેમના પર શક-વહેમ રાખી અપશબ્દો બોલતા, ગાળાગાળી કરતા, મારપીટ કરવા હાથ ઉપાડતા તેમજ ઘરેથી નીકળી જવા કહેતા હતા. પતિના આવા વર્તનથી મહિલા માનસિક તણાવ અનુભવતી હતી અને પરિવારનું વાતાવરણ પણ અશાંત બન્યું હતું.

મહિલાએ જણાવ્યું હતું કે તેમનો મુખ્ય હેતુ પતિ વિરુદ્ધ તાત્કાલિક કોઈ કાર્યવાહી કરાવવાનો નહીં, પરંતુ પતિને સમજાવી તેમના વર્તનમાં સુધારો લાવી પરિવારનું વાતાવરણ શાંતિપૂર્ણ બનાવવાનો હતો. તેથી તેમણે અભયમ 181ની મદદ માગી હતી.

કોલ મળતાં જ અભયમ 181 તાપી રેસ્ક્યુ ટીમ તાત્કાલિક સ્થળ પર પહોંચી હતી. ટીમે સૌપ્રથમ મહિલાની વાત ગોપનીયતા અને સંવેદનશીલતા સાથે સાંભળી હતી. ત્યારબાદ પતિની વાત પણ જાણી સમગ્ર પરિસ્થિતિનું નિષ્પક્ષ મૂલ્યાંકન કરવામાં આવ્યું હતું.

અભયમ ટીમે દંપતીને સમજાવ્યું હતું કે વ્યસન, શક-વહેમ, અપશબ્દો, ધમકી, મારપીટ અને સતત માનસિક ત્રાસથી દાંપત્યજીવન તથા પરિવારના વાતાવરણ પર નકારાત્મક અસર થાય છે. નાની-નાની બાબતોને લઈને થતા મતભેદોને ઝઘડામાં ન ફેરવવા તથા પરસ્પર સન્માન, વિશ્વાસ અને સંવાદ દ્વારા પ્રશ્નોનું નિરાકરણ લાવવા સમજાવવામાં આવ્યું હતું.

ટીમ દ્વારા પતિનું અસરકારક કાઉન્સેલિંગ કરવામાં આવ્યું હતું. પતિને વ્યસનથી દૂર રહેવા, પત્ની સાથે સન્માનપૂર્વક વર્તન કરવા, શક-વહેમ ટાળવા, ગુસ્સા પર નિયંત્રણ રાખવા તથા પરિવારનું વાતાવરણ શાંતિપૂર્ણ જાળવવા સમજાવવામાં આવ્યા હતા. સાથે જ મહિલાને પોતાની સલામતી, અધિકારો અને ઉપલબ્ધ સહાય અંગે જરૂરી માર્ગદર્શન આપવામાં આવ્યું હતું.

કાઉન્સેલિંગ દરમિયાન અભયમ ટીમે મહિલાને ઘરેલુ હિંસાથી મહિલાઓનું રક્ષણ અધિનિયમ, 2005 અંગે સરળ ભાષામાં માહિતી આપી હતી. મહિલાને સમજાવવામાં આવ્યું હતું કે શારીરિક, માનસિક, મૌખિક, ભાવનાત્મક અથવા આર્થિક પ્રકારનો ત્રાસ ઘરેલુ હિંસાના સ્વરૂપમાં આવી શકે છે અને જરૂરિયાત જણાય ત્યારે મહિલા કાયદાકીય રક્ષણ તથા યોગ્ય કાયદાકીય સહાય મેળવી શકે છે.

અભયમ ટીમે મહિલાને પરિસ્થિતિ ગંભીર બને તો પોલીસ તથા સંબંધિત કાયદાકીય સહાય મેળવવાની પ્રક્રિયા અંગે પણ જરૂરી માર્ગદર્શન આપ્યું હતું. મહિલાની ઇચ્છા, સલામતી અને હિતને ધ્યાનમાં રાખીને આગળની કાર્યવાહી અંગે પણ સમજ આપવામાં આવી હતી.

અસરકારક કાઉન્સેલિંગ બાદ પતિએ પોતાની વર્તણૂક અંગેની ભૂલ સ્વીકારી હતી. તેમણે હવે પછી પત્ની સાથે યોગ્ય અને સન્માનજનક વર્તન રાખવા, પરિવારનું વાતાવરણ શાંતિપૂર્ણ રાખવા તથા પોતાના વ્યસનમાં સુધારો લાવવા પ્રયત્નશીલ રહેવાની લેખિત બાંહેધરી આપી હતી.

પતિએ પોતાની ભૂલ સુધારવા માટે એક તક આપવા વિનંતી કરી હતી. મહિલાએ પણ પતિ દ્વારા સુધારો લાવવાની ખાતરી આપવામાં આવતા અને બંને પક્ષની સંમતિથી હાલની પરિસ્થિતિને કાઉન્સેલિંગના માધ્યમથી ઉકેલવાનો નિર્ણય સ્વીકાર્યો હતો. બંને પક્ષની સંમતિથી અભયમ 181 ટીમે દંપતી વચ્ચે સુખદ સમાધાન કરાવવામાં સફળતા મેળવી હતી.

આ સમગ્ર કામગીરી દરમિયાન અભયમ 181 ટીમે મહિલાની વાત સાંભળી, પરિસ્થિતિનું મૂલ્યાંકન કર્યું, સ્થળ પર પહોંચી બંને પક્ષનું અસરકારક કાઉન્સેલિંગ કર્યું, મહિલાને તેના અધિકારો અને કાયદાકીય સહાય અંગે માહિતી આપી તથા પતિને પોતાની વર્તણૂકમાં સુધારો કરવા માટે સમજાવ્યા હતા. ટીમ દ્વારા મહિલાની સલામતી અને હિતને ધ્યાનમાં રાખી સંવેદનશીલ રીતે પરિવારના વિવાદનું નિરાકરણ લાવવાનો પ્રયાસ કરવામાં આવ્યો હતો.

આ ઘટનામાં અભયમ 181ની સમયસરની રેસ્ક્યુ કામગીરી, અસરકારક કાઉન્સેલિંગ, કાયદાકીય માર્ગદર્શન અને સંવેદનશીલ અભિગમના પરિણામે દંપતી વચ્ચેનો વિવાદ શાંતિપૂર્ણ રીતે ઉકેલવામાં આવ્યો હતો. બંને પક્ષે પરિવારનું વાતાવરણ સુખદ અને શાંતિપૂર્ણ રાખવા સંમતિ દર્શાવી હતી.

મહિલાએ પોતાને મળેલી સમયસરની મદદ, કાઉન્સેલિંગ અને માર્ગદર્શન બદલ અભયમ 181 તાપી ટીમનો આભાર વ્યક્ત કર્યો હતો.

○○○

સૌથી મહત્વપૂર્ણ બાબતથી ચૂકશો નહીં.

👉🏻 ગુજરાત રક્ષા હમણાં જ ડાઉનલોડ કરો અને માહિતીની શક્તિથી સુરક્ષિત રહો !

________________