સારસ્વત કપ-11 : ઓલપાડ તાલુકા પ્રાથમિક શિક્ષક સંઘ આયોજીત ટેનિસ ક્રિકેટ ટુર્નામેન્ટમાં રાજનગર ઝોન ચેમ્પિયન
રાજનગર ઝોન તરફથી રમતાં તાલુકા પ્રાથમિક શિક્ષણાધિકારી નગીન પટેલે ‘બેસ્ટ બોલર’ નો ખિતાબ હાંસલ કર્યો
(પ્રતિનિધિ દ્વારા, ઓલપાડ) : ઓલપાડ તાલુકા પ્રાથમિક શિક્ષક સંઘ આયોજીત તાલુકામાં ફરજ બજાવતા શિક્ષકો માટે ટેનિસ ક્રિકેટ ટુર્નામેન્ટ કાંઠા વિસ્તાર સ્થિત મોરટુંડા ગામનાં ક્રિકેટ ગ્રાઉન્ડ ખાતે યોજવામાં આવી હતી. ઓલપાડ તાલુકા પ્રાથમિક શિક્ષક સંઘ આયોજીત આ 11મી ક્રિકેટ ટુર્નામેન્ટ કુદિયાણા, કીમ, સાયણ અને રાજનગર એમ ચાર ઝોનમાં રમાડવામાં આવી હતી. જેમાં તાલુકાનાં પ્રાથમિક શિક્ષકોએ ઉત્સાહભેર ભાગ લીધો હતો.
ટુર્નામેન્ટનાં ઉદઘાટન પ્રસંગે સૌને સંબોધતાં જિલ્લા પ્રાથમિક શિક્ષક સંઘનાં પ્રમુખ કિરીટ પટેલે જણાવ્યું હતું કે બાળકોનાં સર્વાંગી વિકાસ કાજે હરહંમેશ પ્રયત્નશીલ શિક્ષકો પોતાનાં રૂટિન કાર્યબોજ વચ્ચે હળવાશ અનુભવે એ માટે આવા વિશેષ આયોજનો સાર્થક નીવડે છે. વળી આ પ્લેટફોર્મ શિક્ષકો-શિક્ષકો વચ્ચે નવા સંબંધો પણ પ્રસ્થાપિત કરે છે. પરસ્પર નવાચારનાં આદાનપ્રદાન થકી તેમનામાં કાર્ય કરવાનું ચોકકસ નવું બળ ઉમેરાય છે. આ સાથે ઓલપાડ તાલુકા પ્રાથમિક શિક્ષક સંઘનાં પ્રમુખ બળદેવ પટેલે પોતાનાં પ્રાસંગિક ઉદબોધનમાં ખેલાડીઓને પ્રોત્સાહિત કરી શાળામાં શિક્ષણની સાથોસાથ પોતાનાં બાળકોને પણ રમત ક્ષેત્રે નવી દિશા ચીંધવા અનુરોધ કર્યો હતો.
ટુર્નામેન્ટની તમામ લીગ મેચો બાદ ટુર્નામેન્ટની ફાઈનલ મેચમાં રાજનગર ઝોન અને કુંદિયાણા ઝોનની ટીમ ટકરાઈ હતી. રાજનગર ઝોનની ટીમે ટોસ જીતીને ફિલ્ડિંગ પસંદ કરી હતી. પ્રથમ બેટિંગ કરતાં કુંદિયાણા ઝોનની ટીમે નિર્ધારિત 10 ઓવરમાં 5 વિકેટે 99 રન કર્યા હતાં. રાજનગર ઝોને આ લક્ષ્યાંક 9.3 ઓવરમાં 3 વિકેટ ગુમાવી ચેઝ કર્યો હતો. આમ આ આંતર ઝોન ટેનિસ ક્રિકેટ ટુર્નામેન્ટમાં રાજનગર ઝોનની ટીમ ચેમ્પિયન બની હતી. ટુર્નામેન્ટનાં અંતે ડભારી પ્રાથમિક શાળાનાં ઉપશિક્ષક ઈલેશ ચૌધરી ‘બેસ્ટ બેટસમેન’ તથા ગોલા પ્રાથમિક શાળાનાં ઉપશિક્ષક ચિંતન પટેલ ‘મેન ઓફ ધ સિરિઝ’ તરીકે જાહેર થયા હતાં. જયારે રાજનગર ઝોન તરફથી રમતાં તાલુકા પ્રાથમિક શિક્ષણાધિકારી નગીન પટેલ ‘બેસ્ટ બોલર’ ઘોષિત થયા હતાં.
અંતમાં મહાનુભાવોનાં હસ્તે વિજેતાઓને વિવિધ ટ્રોફીઓ એનાયત કરવામાં આવી હતી. આ પ્રસંગે બી.આર.સી. કો-ઓર્ડિનેટર બ્રિજેશ પટેલ, તાલુકા પ્રાથમિક શિક્ષક પ્રાથમિક સંઘનાં મહામંત્રી મહેન્દ્રસિંહ ઠાકોર તથા હોદ્દેદારો, ઓલપાડ તાલુકા પ્રાયમરી ટીચર્સ સોસાયટીનાં સેક્રેટરી ભરત પટેલ તથા શશીકાંત પટેલ તથા પિંજરતનાં સી.આર.સી. કો-ઓર્ડિનેટર પરેશ પટેલે ઉપસ્થિત રહીને ખેલાડીઓને પ્રોત્સાહિત કર્યા હતાં.
આરંભથી અંત સુધી ટુર્નામેન્ટને આનંદદાયી બનાવીને તેને સફળતાપૂર્વક સંપન્ન કરવા પિંજરત કેન્દ્ર સંલગ્ન પ્રાથમિક પ્રાથમિક શાળાઓનાં શિક્ષકો નરેન્દ્ર પટેલ, જયેશ પટેલ, તખ્તસિંહ પટેલ, તેજસ ખલાસી તથા જગદીશ પટેલે ભારે જહેમત ઉઠાવી હતી. ટુર્નામેન્ટમાં કોમેન્ટ્રેટર તરીકે સાયણ સુગર પ્રાથમિક શાળાનાં ઉપશિક્ષક દિનકર પટેલે ઉત્કૃષ્ટ સેવા આપી હતી. ટુર્નામેન્ટમાં એનાઉન્સની કામગીરી લવાછાચોર્યાસી પ્રાથમિક શાળાનાં મુખ્યશિક્ષક કનૈયા પટેલે સંભાળી હતી. એમ પ્રચાર-પ્રસાર પ્રતિનિધિ વિજય પટેલ એક અખબારી યાદીમાં જણાવે છે.
વધુ અપડેટ અને સમાચારો મેળવવા માટે ગુજરાત રક્ષાના whatsapp ગ્રુપમાં જોડાવો, અહીં ટચ કરો.
About The Author
