સાયણ સુગર પ્રાથમિક શાળામાં આવકાર, વિદાય, સન્માનનો ત્રિવિધ કાર્યક્રમ યોજાયો
(પ્રતિનિધિ દ્વારા, ઓલપાડ) : જિલ્લા પંચાયત શિક્ષણ સમિતિ, સુરત સંચાલિત ઓલપાડ તાલુકાની સાયણ સુગર પ્રાથમિક શાળામાં આવેલ નવા શિક્ષક મિત્રો દિનકર પટેલ, કુસુમ ચૌધરી અને ટ્વીંકલ ગાંધીનો સત્કાર સમારંભ અને શાળામાંથી વિદાય થતાં જ્ઞાન સહાયક લલિતાબેન ચૌધરીનો વિદાય સમારંભ તથા શાળાની તેજસ્વી વિદ્યાર્થીની અંજની ભરવાડનાં સન્માનનો ત્રિવિધ કાર્યક્રમ યોજવામાં આવ્યો હતો.
આ પ્રસંગે શાળાનાં આચાર્ય જગદીશ પ્રજાપતિએ નવા સ્ટાફ મિત્રોને પુષ્પગુચ્છ અર્પી શાળા સહિત બાળકોનાં સર્વાંગી વિકાસમાં ખભેખભા મિલાવી જોડાઈ જવાનાં આહવાન સાથે તેમને માનપૂર્વક આવકાર્યા હતાં. શાળા સ્ટાફગણે પોતાની વચ્ચેથી વિદાય લઈ રહેલાં જ્ઞાનસહાયક એવાં લલિતાબેન ચૌધરીને ખૂબજ આદરભાવ સાથે તેમનાં ઉજ્જવળ ભવિષ્ય માટે શુભેચ્છા પાઠવી હતી.
કાર્યક્રમનાં અંતિમ ચરણમાં શાળાની તેજસ્વી વિદ્યાર્થીની અંજની ભરવાડને પ્રમાણપત્ર એનાયત કરવામાં આવ્યું હતું. આ તકે શાળાનાં ઉપશિક્ષિકા જિજ્ઞાસા સોલંકીએ પોતાનાં તરફથી રોકડ રૂપિયા 501 આ તેજસ્વી વિદ્યાર્થીનીને ઈનામ સ્વરૂપે અર્પણ કર્યા હતાં.
સદર કાર્યક્રમનું સંચાલન ચિત્રમંજુસા પટેલ અને હીના ત્રિવેદીએ કર્યું હતું. અંતમાં આભારવિધિ શાળાનાં સિનિયર શિક્ષક અરવિંદ ગામીતે આટોપી હતી. એમ પ્રચાર-પ્રસાર પ્રતિનિધિ વિજય પટેલ એક અખબારી યાદીમાં જણાવે છે.
વધુ અપડેટ અને સમાચારો મેળવવા માટે ગુજરાત રક્ષાના whatsapp ગ્રુપમાં જોડાવો, અહીં ટચ કરો.
About The Author
