ઓલપાડની જીણોદ પ્રાથમિક શાળામાં ધોરણ 8 નાં બાળકોનો વિદાય સમારંભ યોજાયો
(પ્રતિનિધિ દ્વારા, ઓલપાડ) : ઓલપાડ તાલુકાની જિલ્લા પંચાયત શિક્ષણ સમિતિ, સુરત સંચાલિત જીણોદ ગામની પ્રાથમિક શાળામાં આજરોજ વેકેશનની પૂર્વ સંધ્યાએ ધોરણ 8 માં અભ્યાસ કરતાં બાળકોનો વિદાય સમારંભ યોજવામાં આવ્યો હતો. ધોરણ 8 માં અભ્યાસ કરી રહેલાં બાળકો માટે આ વર્ષ શાળાનું અંતિમ વર્ષ હોઈ બાળકો પોતાની ઉજ્જવળ કારકિર્દી બનાવવા માધ્યમિક કક્ષાએ જઈ રહ્યાં છે ત્યારે શાળાનાં શિક્ષકો દ્વારા બાળકોને શુભેચ્છાઓ સાથે આશીર્વચન પાઠવવામાં આવ્યા હતાં. આ પ્રસંગે શાળા વ્યવસ્થાપન સમિતિનાં સભ્યો તથા વાલીજનો ખાસ ઉપસ્થિત રહ્યાં હતાં.
વિદાય લઈ રહેલાં બાળકોએ આ શાળામાં વિતાવેલા 8 વર્ષોને યાદ કરી પોતાની આંખો ભીની કરી હતી. શાળાનાં આચાર્ય અંકિતા પટેલે સૌને માધ્યમિક શિક્ષણ માટે શુભેચ્છા પાઠવી હતી. શાળાનાં ગણિત-વિજ્ઞાન શિક્ષક ચિરાગ પટેલે સૌ બાળકોને નિષ્ઠા અને આત્મવિશ્વાસ સાથે ભણીગણીને સમાજમાં નોંધપાત્ર સ્થાન હાંસલ કરવા માટેનાં શુભ આશિષ પાઠવ્યા હતાં. પ્રારંભે શાળાનાં ઉપશિક્ષિકા આશા ખોલીયાએ સૌ વાલીજનોને આવકાર્યા હતાં જ્યારે અંતમાં આભારવિધિ ઉપશિક્ષિકા રેખા રાઠોડે આટોપી હતી. સમારંભનાં અંતે સૌએ સાથે પ્રિતિભોજનનો આસ્વાદ માણ્યો હતો. એમ પ્રચાર-પ્રસાર પ્રતિનિધિ વિજય પટેલ એક અખબારીમાં જણાવે છે.
About The Author
