ઓલપાડની કઠોદરા પ્રાથમિક શાળાએ ધોરણ 8 નાં વિદ્યાર્થીઓનાં વિદાયમાન પ્રસંગે કોમી એકતા ઉજાગર કરી
પવિત્ર રમજાન માસ દરમિયાન પૂરો રમજાન માસ રોજા રાખનાર મુસ્લિમ વિદ્યાર્થીઓનું વિશેષ સન્માન
જીવન એક સતત નાવીન્યપૂર્ણ પ્રયાસ છે ત્યારે શિક્ષકોએ આપેલ જ્ઞાનનો હકારાત્મક ઉપયોગ ફળદાયી નીવડશે : ડો.યજ્ઞેશ પુરોહિત
(પ્રતિનિધિ દ્વારા, ઓલપાડ) : ઓલપાડ તાલુકાની જિલ્લા પંચાયત શિક્ષણ સમિતિ સંચાલિત કઠોદરા પ્રાથમિક શાળામાં ધોરણ 8 નાં વિદ્યાર્થીઓનો વિદાય સમારંભ યોજવામાં આવ્યો હતો. કાર્યક્રમમાં કીમનાં કેન્દ્રાચાર્ય દિનેશ પટેલ, જિલ્લા પ્રાથમિક શિક્ષક સંઘનાં પ્રતિનિધિ ભુપેન્દ્ર પટેલ, તાલુકા પ્રાથમિક શિક્ષક સંઘનાં પ્રતિનિધિ સતિષ પરમાર, સી.આર.સી. કો-ઓર્ડિનેટર અશોક પટેલ, શાળા વ્યવસ્થાપન સમિતિનાં સભ્યો તથા વાલીજનો ઉપસ્થિત રહ્યાં હતાં. આ પ્રસંગે કેન્દ્રાચાર્ય દિનેશ પટેલ અને સી.આર.સી. કો-ઓર્ડિનેટર અશોક પટેલે પ્રાથમિક શિક્ષણનું જીવનમાં મહત્વ અને ખાસ કરીને સરકારી પ્રાથમિક શાળાનાં શિક્ષકોની બાળકો પ્રત્યેની વિશેષ કાળજી લેવાનાં સ્વભાવ વિશેની વાત કરી હતી. શાળાનાં આચાર્ય ડો.યજ્ઞેશ પુરોહિતે જીવન એક સતત નાવીન્યપૂર્ણ પ્રયાસ છે તેની સદ્રષ્ટાંત વાત કરીને શાળા સાથેનાં સાચા સંબંધ સાચવવા અને ભવિષ્યમાં જે જ્ઞાન આ શાળામાંથી તમામ શિક્ષકોએ ખૂબ મહેનતથી આપ્યું છે તેનો હકારાત્મક ઉપયોગ કરવાની વિદ્યાર્થીઓને વાત કરી હતી.
સદર કાર્યક્રમમાં પવિત્ર રમજાન માસ દરમિયાન પૂરો રમજાન માસ રોજા રાખનાર મુસ્લિમ વિદ્યાર્થીઓનું વિશેષ સન્માન કરવામાં આવ્યું હતું. આ તબક્કે ગામનાં સરપંચ સોયબ બદાત અને મૌલવી ઇમરાનભાઈએ પણ શાળાનાં આવા એકતાભર્યા વાતાવરણની પ્રશંસા કરીને બાળકોને આશીર્વચન આપ્યા હતાં. ધોરણ 8 નાં વિદ્યાર્થીઓ દ્વારા શાળાને સ્મૃતિભેટ આપવામાં આવી હતી જ્યારે શાળા દ્વારા પણ તમામ બાળકોને કુમકુમ તિલક કરી રિટર્ન ગિફ્ટ આપવામાં આવી હતી. સમગ્ર કાર્યક્રમનું સંચાલન શાળાનાં ઉપશિક્ષિકા સુધા મનાણી દ્વારા કરવામાં આવ્યું હતું જ્યારે આભારવિધિ શાળાનાં ઉપશિક્ષિકા ડો.હેમલતા પરમારે કરી હતી. એમ પ્રચાર-પ્રસાર પ્રતિનિધિ વિજય પટેલ એક અખબારી યાદીમાં જણાવે છે.
About The Author
