ઓલપાડની પારડીઝાંખરી પ્રાથમિક શાળામાં ધોરણ 8 નાં વિદ્યાર્થીઓનો વિદાય સમારંભ યોજાયો
(પ્રતિનિધિ દ્વારા. વ્યારા) : વિદ્યાર્થીઓ પોતાનાં અભ્યાસકાળ દરમિયાન સૌથી વધુ વર્ષો પ્રાથમિક શાળાઓમાં વીતાવે છે. તેઓ જીવનનાં પાઠ શીખવાની શરૂઆત પણ પ્રાથમિક શાળાથી કરે છે તેથી તેમનાં જીવનમાં પ્રાથમિક શાળા, પ્રાથમિક શિક્ષણ અને પ્રાથમિક શિક્ષકની છાપ અમીટ રહેતી હોય છે.
ઓલપાડ તાલુકાની જિલ્લા પંચાયત શિક્ષણ સમિતિ સંચાલિત પારડીઝાંખરી પ્રાથમિક શાળામાં અભ્યાસ કરતાં ધોરણ 8 નાં વિદ્યાર્થીઓનો વિદાય સમારંભ યોજવામાં આવ્યો હતો. જેમાં ગામનાં સરપંચ જયેશભાઈ પટેલ, પારડીઝાંખરી દૂધ મંડળીનાં ડિરેકટર યોગેશભાઈ પટેલ તથા SMC સભ્યો ઉપસ્થિત રહ્યાં હતાં. પ્રારંભે પ્રાર્થના સ્વાગતગીત બાદ વિદાય લેતાં તમામ વિદ્યાર્થીઓને કુમકુમ તિલક કરી મોં મીઠું કરાવવામાં આવ્યું હતું. આ પ્રસંગે વિદ્યાર્થીઓએ કેક કાપી પોતાની સ્મૃતિરૂપે શાળા પરિવારને ઈલેક્ટ્રિક સગડી ભેટ આપી હતી.
આ તકે શાળાનાં આચાર્ય રમેશભાઈ પટેલ તથા સરપંચ જયેશભાઈ પટેલ દ્વારા ધોરણ 8 નાં વિધાર્થીઓને ઉત્તરોત્તર પ્રગતિ કરી ગામ તથા શાળાનું નામ રોશન કરે એવી હાર્દિક શુભેચ્છાઓ પાઠવવામાં આવી હતી. આ સાથે શાળાનાં શિક્ષિકાબહેનો ધર્મિષ્ઠા પટેલ, નીતા પટેલ, જશુ પટેલ, અનામિકા પટેલ તથા ભક્તિ પટેલે પણ વિધાર્થીઓને ઉજ્જવળ ભવિષ્ય માટે આશીર્વચન પાઠવ્યાં હતાં. કાર્યક્રમનાં અંતે શાળાનાં તમામ વિધાર્થીઓને શિક્ષકગણ તરફથી ભોજન આપવામાં આવ્યું હતું. એમ પ્રચાર-પ્રસાર પ્રતિનિધિ વિજય પટેલ એક અખબારી યાદીમાં જણાવે છે.
About The Author
