ઓલપાડની સરસ પ્રાથમિક શાળામાં ત્રિવેણી મહોત્સવ અંતર્ગત શાળા સ્થાપનાદિન ઉજવણી, આચાર્ય વિદાય સન્માન તથા સાંસ્કૃતિક કાર્યક્રમ યોજાયો
(પ્રતિનિધિ દ્વારા, ઓલપાડ) : જિલ્લા પંચાયત શિક્ષણ સમિતિ, સુરત સંચાલિત ઓલપાડ તાલુકાની સરસ પ્રાથમિક શાળાનાં 162 માં સ્થાપના દિવસની ભવ્ય ઉજવણી કરવામાં આવી હતી. ઉપસ્થિત મહાનુભવોનાં હસ્તે દીપ પ્રજવલન થયાં બાદ ખૂબજ હર્ષોલ્લાસભર્યા માહોલમાં કેક કાપી શાળાનાં સ્થાપના દિવસની ગૌરવભેર ઉજવણી કરવામાં આવી હતી. ઢળતી સાંજે શાળા પટાંગણમાં રંગારંગ કાર્યક્રમનું આયોજન કરવામાં આવ્યું હતું. જેમાં શાળાનાં બાળકો તથા ગામની યુવતીઓએ નાટક, ફિલ્મીગીત, શૌર્યગીત, અભિનયગીત જેવી અવનવી સાંસ્કૃતિક કૃતિઓ રજૂ કરી હતી.
આ વિશેષ અવસરે છેલ્લાં 17 વર્ષથી સતત પ્રવૃત્તિમય અને જવાબદારીઓનાં મેઘધનુષી રંગોથી સભર વ્યક્તિત્વ ધરાવતાં શાળામાં આચાર્ય તરીકે ફરજ બજાવતાં રમણલાલ સાકરલાલ ચૌહાણનો નિવૃત્તિ વિદાય સન્માન સમારંભ પણ યોજવામાં આવ્યો હતો. ઉપસ્થિત મહાનુભવો તથા સ્ટાફગણનાં હસ્તે તેમનું શાલ ઓઢાડી પુષ્પગુચ્છ સાથે સન્માનપત્ર તથા સ્મૃતિભેટ અર્પણ કરી બહુમાન કરવામાં આવ્યું હતું. આ તબક્કે રમણલાલ પોતાનો પ્રતિભાવ આપતાં ભાવવિભોર બન્યાં હતાં. વિદાય ટાણે ખાસ ઉપસ્થિત મહાનુભવોએ પોતપોતાનાં પ્રાસંગિક ઉદબોધનમાં રમણલાલનાં બહુમુખી વ્યક્તિત્વ, શૈક્ષણિક તેમજ વહીવટી કુશળતા, બાળકેન્દ્રી શિક્ષણેત્તર પ્રવૃત્તિઓ, પારિવારિક ભાવનાને બિરદાવી તેમનાં તંદુરસ્ત દીર્ઘાયુ જીવન માટે પ્રભુ પ્રાર્થના કરી હતી.
પ્રારંભે શાળાનાં ઉપશિક્ષિકા રાગિણીબેન પટેલે સૌનું શાબ્દિક સ્વાગત કરી શાળાનાં ઈતિહાસનું સવિસ્તર વર્ણન કર્યું હતું. આ સાથે તેમણે શાળાની પ્રગતિનો ચિતાર રજૂ કરી સહકર્મી શિક્ષકગણની કામગીરી તથા ગ્રામજનોનાં સહયોગને બિરદાવ્યો હતો. સ્થાનિક શાળાનાં ભૂતપૂર્વ વિદ્યાર્થી અને ગામનાં વતની એવાં ઓલપાડનાં ઈન્ચાર્જ તાલુકા પ્રાથમિક શિક્ષણાધિકારી નગીનભાઈ પટેલને સદર ત્રિવેણી મહોત્સવનું અધ્યક્ષસ્થાન પ્રદાન કરી ગ્રામજનોએ વિશેષ સન્માન કર્યુ હતું. આ તકે નગીનભાઈએ પોતાનાં શાળાકીય સંસ્મરણો વાગોળ્યા હતાં.
કાર્યક્રમની શોભામાં અભિવૃધ્ધિ કરવા તાલુકા પંચાયત ઉપપ્રમુખ કિરણભાઈ પટેલ, ઓલપાડ તાલુકા પ્રાથમિક શિક્ષક સંઘનાં પ્રમુખ બળદેવભાઈ પટેલ તથા હોદ્દેદારો, બી.આર.સી. કો-ઓર્ડિનેટર બ્રિજેશ પટેલ, ગામનાં સરપંચ હિતેશભાઈ પટેલ તથા ગ્રામ પંચાયત સભ્યો, એસ.એમ.સી. અધ્યક્ષ પ્રિયાબેન પટેલ તથા સભ્યો, ભાજપા એસ.સી. મોરચા પ્રમુખ પ્રવિણભાઈ મકવાણા, વિવિધ શાળાઓનાં મુખ્યશિક્ષકો, દાતાઓ, ગામનાં આગેવાનો ઉપરાંત મોટી સંખ્યામાં વાલીજનો ઉપસ્થિત રહ્યા હતાં. કાર્યક્રમનું સુંદર સંચાલન રાકેશ જોગીએ કર્યું હતું. કાર્યક્રમને સફળ બનાવવા સ્થાનિક શાળાનાં શિક્ષકો તથા ગામનાં સરપંચ હિતેશભાઈએ જહેમત ઉઠાવી હતી. અંતમાં આભારવિધિ શાળાનાં ઉપશિક્ષિકા શર્મિલાબેન પટેલે આટોપી હતી. એમ પ્રચાર-પ્રસાર પ્રતિનિધિ વિજય પટેલ એક અખબારી યાદીમાં જણાવે છે.
About The Author
