ઓલપાડનાં આડમોર ખાતે કુદિયાણા કેન્દ્ર સંલગ્ન પ્રાથમિક શાળાઓનો રમતોત્સવ યોજાયો
(પ્રતિનિધિ દ્વારા, ઓલપાડ) : શિક્ષણ અને સંસ્કારની સાથે બાળકો રમતગમત ક્ષેત્રે પણ પોતાનું કૌશલ્ય કેળવે એવાં શુભ હેતુસર કુદિયાણા કેન્દ્ર દ્વારા શિયાળુ રમતોત્સવ તાલુકાનાં છેવાડાનાં કાંઠા વિસ્તાર સ્થિત આડમોર ગામનાં ક્રિકેટ ગ્રાઉન્ડ ખાતે યોજવામાં આવ્યો હતો. જેમાં કુદિયાણા કેન્દ્ર સંલગ્ન પ્રાથમિક શાળાઓનાં બાલવાટિકાથી લઈ ધોરણ 1 થી 8 નાં બાળકોએ ખૂબજ ઉત્સાહભેર ભાગ લીધો હતો.
આ પ્રસંગે તાલુકા પંચાયતનાં સદસ્ય અને માજી કારોબારી અધ્યક્ષ મુકેશભાઈ ઉર્ફે જયેશભાઈ પટેલ, ઈન્ચાર્જ તાલુકા પ્રાથમિક શિક્ષણાધિકારી નગીનભાઈ પટેલ, બી.આર.સી. કો-ઓર્ડિનેટર બ્રિજેશ પટેલ, ઓલપાડ તાલુકા પ્રાથમિક શિક્ષક સંઘનાં પ્રમુખ બળદેવભાઈ પટેલ, મહામંત્રી મહેન્દ્રસિંહ ઠાકોર, કેન્દ્વાચાર્ય વિનોદ પટેલ, સી.આર.સી. કો-ઓર્ડિનેટર હેમાલી પટેલ તેમજ ગ્રામજનો મોટી સંખ્યામાં ઉપસ્થિત રહ્યાં હતાં. આડમોર પ્રાથમિક શાળાનાં આચાર્ય અશોક પટેલે સૌને શબ્દગુચ્છ દ્વારા આવકાર્યા હતાં.
રમતોત્સવનાં ઉદઘાટક સુરત જિલ્લા પ્રાથમિક શિક્ષક સંઘનાં પ્રમુખ કિરીટભાઈ પટેલે બાળકોને પ્રોત્સાહિત કરતાં પોતાનાં પ્રાસંગિક ઉદબોધનમાં જણાવ્યું હતું કે જીવનમાં શારિરીક અને માનસિક તદુંરસ્તી જરૂરી નહિ પરંતુ અનિવાર્ય છે. રમતમાં વિજેતા બનવું મહત્ત્વનું નથી પણ ભાગ લેવું મહત્વનું છે. આ તકે તેમણે રમતોત્સવનાં દાતાઓની ઉદ્દાત ભાવનાને બિરદાવી તેમને અભિનંદન પાઠવ્યા હતાં. ઓલપાડ તાલુકા પ્રાથમિક શિક્ષક સંઘનાં પ્રમુખ બળદેવભાઈ પટેલે પ્રેરક ઉદબોધન થકી સૌ સ્પર્ધક બાળકોને શુભેચ્છા પાઠવી હતી.
સદર રમતોત્સવમાં 100 મીટર દોડ, ત્રિપગી દોડ, કોથળા દોડ, રીંગણ દોડ, સિક્કા શોધ, સ્લો સાયકલિંગ, ચાંદલા ચોંટાડવા, દડા ચાલ, લીંબુચમચી, ભૂખ્યા પક્ષી, સોયદોરો, સંગીત ખુરશી જેવી વિવિધ વ્યક્તિગત રમતો યોજવામાં આવી હતી. આ સાથે રમાયેલ સાંઘિક રમતો પૈકી કુમારો માટેની કબડ્ડી સ્પર્ધામાં નરથાણ પ્રાથમિક શાળા જ્યારે કન્યાઓ માટેની ખોખો સ્પર્ધામાં દાંડી પ્રાથમિક શાળા વિજેતા બની હતી. એક થી ત્રણ ક્રમે વિજેતા સ્પર્ધકોને ઉપસ્થિત મહાનુભાવોનાં હસ્તે પ્રોત્સાહક ઇનામો વિતરણ કરવામાં આવ્યા હતાં.
રમતોત્સવને સુપેરે પાર પાડવા કન્વીનર્સ વિનોદ પટેલ તથા કનૈયાલાલ પટેલ, આડમોર પ્રાથમિક શાળા પરિવાર સહિત કુદિયાણા કેન્દ્ર સંલગ્ન પ્રાથમિક શાળાઓનાં શિક્ષક ભાઈ-બહેનોએ જહેમત ઉઠાવી હતી. અંતમાં ગામનાં વતની એવાં તાલુકા પંચાયતનાં સદસ્ય મુકેશભાઈ પટેલે કાર્યક્રમને સફળ બનાવનાર તમામ નામી-અનામી સહયોગીઓનો આભાર વ્યક્ત કર્યો હતો. એમ પ્રચાર-પ્રસાર પ્રતિનિધિ વિજય પટેલ એક અખબારી યાદીમાં જણાવે છે.
About The Author
