ઓલપાડની કરંજ પ્રાથમિક શાળામાં એડવોકેટ એન્ડ નોટરી મનિષ પટેલ દ્વારા તિથિ ભોજન તથા શૈક્ષણિક કીટ વિતરણ
(પ્રતિનિધિ દ્વારા, ઓલપાડ) : મનુષ્ય ઉપર રહેલાં ત્રણ પ્રકારનાં ઋણ એવાં દેવ ઋણ, આચાર્ય ઋણ અને પિતૃ ઋણ પૈકી પિતૃ ઋણ અર્પણ કરવાનાં શુભ ભાવ સાથે ઓલપાડનાં જાણીતા એડવોકેટ એન્ડ નોટરી મનિષ પટેલ દ્વારા પોતાનાં માદરેવતન કરંજ ગામની પ્રાથમિક શાળામાં શૈક્ષણિક કીટ વિતરણ સહિત તિથિ ભોજન યોજવામાં આવ્યું હતું.
આજરોજ નવા વર્ષનાં પ્રારંભે ઓલપાડ તાલુકા વકીલ મંડળનાં પ્રમુખ તરીકે બીજીવાર આરૂઢ થયેલ મનિષ પટેલે ધર્મપત્ની જયશ્રી પટેલ સાથે પોતાનાં સ્વર્ગસ્થ પિતા રમણભાઈનાં જન્મદિવસે શાળામાં અભ્યાસ કરતાં તમામ બાળકોને પાંઉભાજી ઉપરાંત વેજીટેબલ પુલાવ, છાશ અને કચુંબર જેવું પૌષ્ટિક ભોજન ભાવપૂર્વક પીરસ્યું હતું. ભોજનનો આસ્વાદ માણ્યા બાદ બાળકોને મનિષ પટેલે શૈક્ષણિક કીટનું વિતરણ કર્યુ હતું. આ તકે તેમણે સૌ બાળકોને શૈક્ષણિક પ્રગતિ માટે આશીર્વચન પાઠવ્યા હતાં. બાળકોએ આનંદની લાગણી વ્યક્ત કરી તેમને તાળીઓનાં ગડગડાટ સાથે વધાવી લીધાં હતાં.
અંતમાં ઓલપાડ તાલુકા પ્રાથમિક શિક્ષક સંઘનાં મહિલા ઉપપ્રમુખ એવાં સ્થાનિક શાળાનાં આચાર્યા જાગૃતિ પટેલે શાળાનાં બાળકો તેમજ સ્ટાફગણ વતી દાતા મનિષ પટેલનો હૃદયપૂર્વક આભાર વ્યક્ત કર્યો હતો. સાથેજ તેમને ઓલપાડ તાલુકા વકીલ મંડળનાં પ્રમુખપદે નિયુક્ત થવા બદલ અભિનંદન પાઠવ્યા હતાં. એમ તાલુકાનાં પ્રચાર-પ્રસાર પ્રતિનિધિ વિજય પટેલ એક અખબારી યાદીમાં જણાવે છે.
About The Author
