જિલ્લા કક્ષાનાં કલા ઉત્સવમાં ઓલપાડની કુંદિયાણા પ્રાથમિક શાળાની સિધ્ધિ
(પ્રતિનિધિ દ્વારા, ઓલપાડ) : વિદ્યાર્થીઓમાં રહેલી વિવિધ કલા તથા પ્રતિભાને પ્રેરણા અને પ્રોત્સાહન પૂરું પાડવાનાં હેતુસર જિલ્લા શિક્ષણ અને તાલીમ ભવન, સુરત દ્વારા જિલ્લા કક્ષાનાં કલા ઉત્સવનું આયોજન કરવામાં આવ્યું હતું. આ કલા ઉત્સવમાં યોજાયેલ વિવિધ સ્પર્ધાઓ પૈકી બાળકવિ સ્પર્ધામાં ઓલપાડ તાલુકાની કુંદિયાણા પ્રાથમિક શાળાની ધોરણ- 8 માં અભ્યાસ કરતી હની અરવિંદભાઈ પટેલે તૃતિય ક્રમે વિજેતા બની શાળાનું નામ રોશન કરેલ છે. તેણીને ઉપસ્થિત મહાનુભવોનાં હસ્તે ટ્રોફી તથા પ્રમાણપત્ર અર્પણ કરવામાં આવ્યાં હતાં.
આ પ્રતિભાશાળી દીકરીને શાળાનાં આચાર્ય વિનોદ પટેલ, ગામનાં સરપંચ નાનુભાઈ પટેલ, એસ.એમ.સી. અધ્યક્ષ કલ્પનાબેન પટેલ, સી.આર.સી. કો-ઓર્ડિનેટર હેમાલી પટેલ સહિત ઓલપાડ તાલુકા પ્રાથમિક શિક્ષક સંઘનાં પ્રમુખ બળદેવભાઈ પટેલ તથા બી.આર.સી. કો-ઓર્ડિનેટર બ્રિજેશ પટેલે હાર્દિક અભિનંદન પાઠવ્યા હતાં. એમ તાલુકાનાં પ્રચાર-પ્રસાર પ્રતિનિધિ વિજય પટેલ એક અખબારી યાદીમાં જણાવે છે.
About The Author
