ઓલપાડની કાંઠા વિસ્તાર સ્થિત મંદરોઇ પ્રાથમિક શાળામાં ગામનાં તેજસ્વી વિદ્યાર્થીઓનો સન્માન સમારંભ યોજાયો
(પ્રતિનિધિ દ્વારા, ઓલપાડ) : ઓલપાડ તાલુકાનાં કાંઠા વિસ્તાર સ્થિત મંદરોઇ ગામે પ્રતિભાશાળી બાળકોનાં સન્માનનો એક કાર્યક્રમ યોજવામાં આવ્યો હતો. આ પ્રસંગે સ્થાનિક ગામનાં ધોરણ-1 થી લઇ ઉચ્ચ અભ્યાસ ક્ષેત્રે નોંધપાત્ર દેખાવ કરેલ વિદ્યાર્થીઓને ગામનાં યુવા સરપંચ કિરણ ચૌહાણ, શાળાનાં આચાર્ય નગીન પટેલ સહિત ઉપસ્થિત અન્ય મહાનુભવો દ્વારા સન્માનપત્ર તથા મોમેન્ટો આપી નવાજવામાં આવ્યા હતાં.
ગામની જિલ્લા પંચાયત શિક્ષણ સમિતિ સંચાલિત પ્રાથમિક શાળામાં યોજાયેલ આ કાર્યક્રમની શરૂઆત સરસ્વતી વંદનાથી કરવામાં આવી હતી. કાર્યક્રમનાં સંયોજક એવાં ગુજરાત એસ.ટી.(સુરત-૧)માં કંડકટર તરીકે ફરજ બજાવતાં પંકજ છગનભાઈ પટેલે સમગ્ર કાર્યક્રમને સફળ બનાવવા જહેમત ઉઠાવી હતી. શાળાનાં ઉપશિક્ષિકા યશુમતિ પટેલે અંતમાં આભારવિધિ આટોપી હતી. એમ પ્રચાર-પ્રસાર પ્રતિનિધિ વિજય પટેલ એક અખબારી યાદીમાં જણાવે છે.
About The Author
