માંગરોળના સીમોદરા ગામની સગીર વયની યુવતીને લગ્નની લાલચે ભગાડી જનાર યુવક વિરુદ્ધ ફરિયાદ નોંધાઇ
અંકલેશ્વરના માંડવા ગામનો ઈસમ ૧૬ વર્ષીય સગીર યુવતીને ભગાડી ગયો…
(નલિન ચૌધરી દ્વારા, ભડ કુવા માંગરોળ) : માંગરોળ તાલુકાના સીમોદરા ગામની ૧૬ વર્ષીય સગીર વયની યુવતીને લગ્નની લાલચ આપી પટાવી ફોસલાવી ભગાડી જનાર યુવક વિરુદ્ધ યુવતીની માતાએ માંગરોળ પોલીસ મથકમાં ફરિયાદ નોંધાવી છે. સીમોદરા ગામની યુવતી ધોરણ ૯માં અભ્યાસ કરતી હતી અને ગત વર્ષે આ યુવતીએ અભ્યાસ છોડી દઈ પોતાના ઘરે જ રહેતી હતી. આ યુવતીને હાલ સીમોદરા ગામે ભરવાડ ફળીયામાં રહેતો અને મૂળ અંકલેશ્વર તાલુકાના માંડવા ગામના ભરતભાઈ સનાભાઇ વસાવા (ઉં.વ ૩૨)એ પ્રેમજાળમાં ફસાવી હતી. ગતરોજ રાત્રે યુવતી ગામની ભાગોળે આવેલ એક દુકાને રાત્રે સામાન ખરીદવા ગઈ હતી ત્યારબાદ પરત યુવતી ઘરે નહીં ફરતા યુવતીની માતાએ શોધખોળ કરી હતી. ત્યારે બાજુમાં રહેતા દક્ષાબેન જણાવ્યું કે બંને વચ્ચે પ્રેમ સંબંધ છે કે નહીં તેની મને ખબર નથી પરંતુ ભરત યુવતીને બાઈક પર બેસાડી ગયો હોવાનું કહ્યું હતું. આ સંદર્ભમાં યુવતીની માતાએ માંગરોળ પોલીસ મથકમાં પોતાના કાયદેસરના વાલીપણામાંથી લગ્નની લાલચ આપી પટાવી ફોસલાવી પોતાની સગીર વયની યુવતીને ભગાડી જનાર ભરત છનાભાઇ વસાવા વિરુદ્ધ માંગરોળ પોલીસ મથકમાં ફરિયાદ નોંધાવી હતી.
About The Author
