કીમ નગરને અડીને આવેલ કઠોદરા ગામની પ્રાથમિક શાળાનાં પ્રતિભાશાળી શિક્ષક બિપીન પારેખનો નિવૃત્તિ વિદાય સન્માન સમારંભ યોજાયો
ગણિત વિષયનાં રિસોર્સ પર્સન તરીકે રાજ્યભરમાં જાણીતા બીપીનભાઈનો વિદાય સમારંભ તેમનાં જન્મદિવસે જ યોજાયો
(પ્રતિનિધિ દ્વારા, ઓલપાડ) : શિક્ષક તરીકેનાં પવિત્ર વ્યવસાયની અવધિ સરકારી નિયમોનુસાર વયમર્યાદાને કારણે પૂર્ણ થતાં શિક્ષકનાં શાળા પરિવાર તથા વાલીજનો સાથેનાં આત્મીય સંબંધો પરસ્પર દુઃખદ લાગણી અનુભવતા હોય છે. શિક્ષણની કેડી પર પગરણ માંડી આજપર્યંત સતત પ્રવૃત્તિમય અને જાતજાતની જવાબદારીઓનાં મેઘધનુષી રંગોથી સભર વ્યક્તિત્વ ધરાવતાં સુરતનાં ઓલપાડ તાલુકાની જિલ્લા પંચાયત શિક્ષણ સમિતિ સંચાલિત કઠોદરા પ્રાથમિક શાળાનાં કર્મનિષ્ઠ-ધર્મનિષ્ઠ ઉપશિક્ષક બિપીનભાઇ વ્રજલાલ પારેખનો નિવૃત્તિ વિદાય સન્માન સમારંભ યોજવામાં આવ્યો હતો.
ઓલપાડ તાલુકા પંચાયત પ્રમુખ નીતાબેન પટેલનાં અધ્યક્ષસ્થાને યોજાયેલા આ વિદાય સમારંભમાં ઓલપાડ તાલુકા પંચાયતનાં માજી પ્રમુખ અમિતભાઇ પટેલ, તાલુકા પંચાયત સદસ્ય સન્મુખભાઇ ઢીમ્મર, તાલુકા પંચાયત સદસ્ય વનરાજસિંહ બારડ, ઇન્ચાર્જ તાલુકા પ્રાથમિક શિક્ષણાધિકારી નગીનભાઈ પટેલ, સુરત જિલ્લા પ્રાથમિક શિક્ષક સંઘનાં પ્રમુખ કિરીટભાઈ પટેલ, બી.આર.સી. કો-ઓર્ડિનેટર બ્રિજેશ પટેલ, ઓલપાડ તાલુકા પ્રાથમિક શિક્ષક સંઘનાં પ્રમુખ બળદેવભાઈ પટેલ, મહામંત્રી મહેન્દ્રસિંહ ઠાકોર તથા સંઘનાં હોદ્દેદારો, કીમ કેન્દ્વાચાર્ય દિનેશભાઇ પટેલ, કીમ કેન્દ્ર સંલગ્ન પ્રાથમિક શાળાઓનાં મુખ્યશિક્ષકો, સી.આર.સી. કો-ઓર્ડિનેટર આકાશ પટેલ, કઠોદરા ગામનાં સરપંચ સોયેબભાઇ બદાત ઉપરાંત ગ્રામજનો અને વાલીજનો મોટી સંખ્યામાં ઉપસ્થિત રહ્યા હતાં. શાળાનાં આચાર્ય યજ્ઞેશભાઇ પુરોહિતે શબ્દગુચ્છ દ્વારા ઉપસ્થિત મહેમાનોને આવકાર્યા હતાં.
આ પ્રસંગે સુરત જિલ્લા પ્રાથમિક શિક્ષક સંઘનાં પ્રમુખ કિરીટભાઈ પટેલે જણાવ્યું હતું કે બિપીનભાઇએ શિક્ષણનાં જીવ તરીકે વિદ્યાર્થીઓ માટે નિર્માણ કરેલ ભાથુ હંમેશા અકબંધ રહેશે. રાજ્ય કક્ષાએ એસ.આર.જી. તરીકેની તેમની ભૂમિકા, ભૂતપૂર્વ સી.આર.સી. કો-ઓર્ડિનેટર તરીકેની તેમની ઉત્કૃષ્ટ કામગીરી ઉપરાંત શિક્ષણ પરિવાર સાથેની તેમની પારિવારિક ભાવના સૌ માટે પ્રેરણાસ્ત્રોત બની રહેશે. તાલુકા શિક્ષક સંઘનાં પ્રમુખ બળદેવભાઈ પટેલે જણાવ્યું હતું કે શિક્ષણની સાથોસાથ શિક્ષણેત્તર પ્રવૃત્તિઓ, સાંસ્કૃતિક પ્રવૃત્તિઓ તથા સંગઠનમાં તેમનું યોગદાન ભૂલી શકાય એમ નથી. આ સાથે અન્ય ઉપસ્થિત મહાનુભવો પૈકી અમિતભાઈ પટેલ, વનરાજસિંહ બારડ તથા નીતાબેન પટેલે પોતપોતાનાં પ્રાસંગિક ઉદબોધનમાં બિપીનભાઇની શૈક્ષણિક તેમજ વહીવટી કુશળતાને બિરદાવી તેમનાં તંદુરસ્ત દીર્ઘાયુ જીવન માટે પ્રભુ પ્રાર્થના કરી હતી.
આ ભાવભીનાં વિદાય પ્રસંગે ઉપસ્થિત મહાનુભાવોનાં હસ્તે તેમનું શાલ ઓઢાડી સન્માન કરવામાં આવ્યું હતું. સાથે તેમને પુષ્પગુચ્છ, સન્માનપત્ર તથા મોમેન્ટો અર્પણ કરી નવાજવામાં આવ્યા હતાં. આ તબક્કે બિપીનભાઇ પોતાનો પ્રતિભાવ આપતા ભાવવિભોર બન્યા હતાં.
આસપાસનાં ગામોનાં સરપંચો, પ્રાથમિક શાળાનાં શિક્ષકો, સ્થાનિક વાલીઓ તથા ગ્રામજનોની ભીડ વચ્ચે શાળાનાં બાળકોએ બિપીનભાઇ સાથેનાં તેમનાં જોશીલા સંસ્મરણો જાહેર મંચ પર રજૂ કરી પોતાની કૃતજ્ઞતા વ્યક્ત કરી હતી. અંતમાં આભારવિધિ પ્રાથમિક શાળાનાં ઉપશિક્ષિકા વિભૂતિબેન પટેલે આટોપી હતી. સમગ્ર કાર્યક્રમનું સફળ સંચાલન સીથાણનાં સી.આર.સી. કો-ઓર્ડિનેટર રાકેશભાઈ મહેતાએ કર્યું હતું. એમ તાલુકાનાં પ્રચાર-પ્રસાર પ્રતિનિધિ વિજય પટેલ એક અખબારી યાદીમાં જણાવે છે.
About The Author
